Sizga yaxshi ma’lumki, yurtimizda xokkeyga bo‘lgan qiziqish avvaldan yuqori bo‘lgan. Biroq, so‘nggi yillarda mamlakatimizda ushbu sport faoliyatida biroz uzilish paydo bo‘lgan va O‘zbekistonda xokkey taraqqiyoti to‘xtab qolgandi.

Bugunga kelib shaxsan muhtaram Prezidentimiz Shavkat Mirziyoyev tomonidan qishki sport turlarini, jumladan xokkeyni ham rivojlantirishga alohida e’tibor qaratilmoqda. Ayni paytda yurtimizda xokkey federasiyasi ham faoliyat olib bormoqda.

Kecha, 13 fevral kuni Milliy olimpiya qo‘mitasida O‘zbekiston xokkey federasiyasining navbatdan tashqari hisobot-saylov Konferensiyasi bo‘lib o‘tdi. Unda MOQ prezidenti Umid Ahmadjonov, O‘zbekiston xokkey federasiyasi rahbariyati va mutasaddilari, hakamlar hamda OAV xodimlari ishtirok etishdi.

Kun tartibidan o‘rin olgan eng asosiy masala federasiya raisiga o‘rinbosar saylashdan iborat edi. Shu munosabat bilan mazkur lavozimga “Binokor” xokkey klubi menejeri Iskandar Qosimovich Shodiyev nomzodi ilgari surildi. Konferensiya ishtirokchilari bir ovozdan ko‘rsatilgan nomzodni qo‘llab-quvvatlashlarini ma’lum qildilar. Shu tariqa, I.SHodiyev O‘zbekiston xokkey federasiyasi raisining o‘rinbosari lavozimiga saylandi.

«Menga ana shunday imkoniyat berilganidan xursandman. O‘zbekistonda xokkey asta-sekinlik bilan rivojlantirilmoqda. Bu yildan milliy chempionat ham tashkil etildi. Poytaxtimizda katta muz arenasi bunyod etilmoqda. Maqsadimiz – xokkeyni Respublika bo‘ylab rivojlantirishdir. Birgalikda ishlab kelajakda muvaffaqiyatlarga erishamiz va vaqti kelib KXLda ham o‘z jamoamiz bo‘ladi», – dedi Iskandar Shodiyev.

MOQ rahbari Umid Ahmadjonov ham kelajakda xokkey yurtimizda rivojlanishi haqida gapirib o‘tdi.
«Mart oyida yurtimizda «Humo» muz saroyi foydalanishga topshiriladi. Kelajakda bunday muz arenalari viloyatlarda ham ko‘payishiga umid qilamiz va xokkeyni butun mamlakatimiz bo‘ylab rivojlantiramiz», – dedi Umid Ahmadjonov.

Shu tariqa, O‘zbekiston xokkey federasiyasining navbatdan tashqari hisobot-saylov konferensiyasi o‘z ishini yakunladi.