"Paxtakor" Osiyo chempionlar ligasining saralash bosqichini muvaffaqiyatli bosib o‘tib, guruh bosqichi yo‘llanmasini qo‘lga kiritdi. Toshkentliklar bugun Birlashgan Arab Amirliklarida "An-Nasr" klubi mehmoni bo‘lib, 2:1 hisobida g‘alaba qozonishdi.

Uchrashuvning 14-daqiqasida hakam Hamrobekov to‘pni qo‘li bilan o‘ynadi deb hisobladi va "Paxtakor" darvozasi tomon penalti belgiladi. Alvaro Negredoning zarbasidan so‘ng to‘p ustun yonidan o‘tib ketdi.

O‘yin davomida to‘p nazorati toshkentliklar tomonida bo‘ldi. Vakillarimizning urinishlari 31-daqiqada o‘z samarasini berdi. Hamdamov chap qanotdan raqib jarima maydonchasiga kirdi va darvoza yaqiniga uzatma berayotganida to‘p "podkat" tashlayotgan himoyachining qo‘liga tegdi. Yaponiyalik referi bu safar mezbonlar darvozasi tomon penalti belgiladi. Cheran undan samarali foydalanib, hisobni ochdi.

Ikkinchi bo‘lim boshida esa vakillarimiz hisobdagi farqni oshirishdi.  Hamdamov chap qanotdan havolatib bergan uzatmani Marat Bikmayev bosh bilan 3-4 metr masofadan darvozaga joylab qo‘ydi.

Oradan 7 daqiqa o‘tib Sadriddin Abdullayev o‘z jarima maydonchasi ichida to‘pni qo‘li bilan o‘ynagani bois, yaponiyalik hakam "Paxtakor" darvozasi tomon penalti belgilandi. Alvaro Negredo bu safar kuchli va aniq zarba bilan darvozani ishg‘ol qildi.

O‘yinning qolgan qismi ancha qiziqarli kechdi. Har ikkala jamoa ko‘plab vaziyatlar yaratishdi. Ayniqsa, Arveladze shogirdlari qarshi hujumlari ancha xavfli bo‘ldi, ammo so‘nggi pallada aniq pas bera olmaslik tufayli hujum gol bilan yakunlanmadi.

O‘yinga qo‘shib berilgan daqiqalarda esa to‘qqizlikka kirayotgan to‘pni Sanjar Quvvatov katta mahorat bilan qaytarib qolganini ta’kidlash lozim.

Shu tariqa, "Paxtakor" Osiyo chempionlar ligasi guruh bosqichi yo‘llanmasini qo‘lga kiritdi.

OCHL, 3-saralash bosqichi,
«AN-NASR» (BAA) - «PAXTAKOR» 1:2 (0:1)
Gollar: Negredo (58-penalti) — Dragan Cheran (31-penalti), Marat Bikmayev (50)
Foydalanilmagan penalti: Negredo (15, noaniq)
Ogohlantirishlar: Xolid Jalol (46) — Odil Hamrobekov (14)
"Paxtakor": Sanjar Quvvatov, Farrux Sayfiyev, Yegor Krimes (s), Sherzod A’zamov, Alijonov, Sadriddin Abdullayev (Dilshod Rahmatullayev 65), Odilbek Hamrobekov, Jaloliddin Masharipov, Dragan Cheran, Dostonbek Hamdamov (Jasur Yaxshiboyev 72), Marat Bikmayev (Igor Sergeev 81)
"An-Nasr": Ibrohim Essa, Mahmud Hamis, Ahmad Ibrohim, Mas’ud Sulaymon, Muhammad Ibrohim, Jon Umari, Xolid Jalol, Tariq Ahmad, Ronni Fernandes, Serjio Dutra, Alvaro Negredo (s)
Hakamlar: Ryuji Sato, Xiroshi Yamauchi, Jun Mixara (Yaponiya), Rovan Armug‘on (Hindiston).
Hakamlar nazoratchisi: Umar Abu Lum (Iordaniya).
Uchrashuv komissari: Tu Ksiliang (Xitoy).