"Paxtakor" bosh murabbiyi Shota Arveladze Osiyo chempionlar ligasining saralash bosqichi doirasida BAAning "An-Nasr" klubiga bo‘lib o‘tgan o‘yin (2:1) borasida o‘z fikrlari bilan o‘rtoqlashdi.

"O‘yinda g‘alaba qozonib, guruh bosqichiga chiqishimiz kerakligini aytgandim. O‘yinchilarim bilan faxrlanaman, ular o‘zlarining eng yaxshi jihatlarini ko‘rsatishdi. Oxirgi haftalarda qattiq mehnat qildik, barchaga rahmat aytaman. Klubimiz prezidenti Bobur Shodiyevga alohida minnatdorchilik bildiraman. U biz uchun barcha sharoitlarni muhayyo etmoqda.

O‘ylaymanki, o‘yin davomida biz ko‘proq vaziyatlar yaratdik. Mezbonlar standart vaziyatlar orqali keskin holatlar yaratishga urinishdi, bizda esa golga tortadigan yaqqol vaziyatlar anchagina bo‘ldi.

O‘zbekiston jamoalari ushbu turnirda avval yaxshi ishtirok etishgan. O‘zbekistonda futbolni juda yoqtirishadi. Biz imkon boricha uzoqroq borishga harakat qilamiz. Guruhimizni, undagi jamoalarni bilamiz. Juda kuchli guruh. Biz bor imkonimizni ishga solishda davom etamiz.

Nafaqat g‘alaba, balki biz amalga oshirayotgan ish ham juda muhim. Buni eng muhim g‘alaba deb aytmayman, ammo Chempionlar Ligasiga chiqish juda muhim edi", — dedi Arveladze.