O‘zbekiston superkubogi bahsi oldidan "Lokomotiv" bosh murabbiyi Andrey Fyodorov o‘z fikrlari bilan o‘rtoqlashdi.
«Murabbiy sifatida ilk marotaba bunday o‘yinda qatnashyapman. Bu mavsumning ilk rasmiy uchrashuvi bo‘ladi. Umid qilamanki, ertaga yaxshi o‘yin bo‘ladi. Bahsda kuchli jamoa g‘alaba qozonsin.
Jamoadagi o‘zgarishlar? Futbolda o‘zgarish bo‘lib turishi normal holat. Futbol bir joyda turmaydi. Biz shunga qaramay oldinga intilamiz. Yangi futbolchilar nafaqat eskilarni o‘rnini egallashadi, balki jamoamizni yanada kuchaytirishadi», – dedi «Lokomotiv» ustozi Andrey Fyodorov.
Xabar qilinganidek, O‘zbekiston superkubogi o‘yini Turkiyaning KOC Elektrik AS kompaniyasi bosh homiyligi ostida kechadi. Mazkur homiylik bo‘yicha O‘zbekiston va Turkiya ishbilarmonlari uyushmasi (O‘TIU) kengashi raisi, Milliy olimpiya qo‘mitasi prezidenti va O‘zbekiston futbol assosiasiyasi birinchi vise-prezidenti maslahatchisi Erjan Bulut o‘z fikrlarini bildirib o‘tdi.
Tadbirning savol-javob qismi yakuniga yetgach, muxlislar futbolchilar bilan birgalikda suratga tushish imkoniyatiga ega bo‘lishdi. Shuningdek, muxlislar uchun avtograf sessiya tashkil etib berildi. Bundan tashqari, ertangi uchrashuv uchun chiptalar taqdim etildi.
Eslatib o‘tamiz, «Lokomotiv» hamda AGMK jamoalari o‘rtasidagi Superkubok o‘yini ertaga soat 16:00 da «Paxtakor» stadionida boshlanadi.
