Bugun 23 fevral kuni O‘zbekiston Superkubogi uchun o‘yin bo‘lib o‘tadi. Unda Toshkentning "Lokomotiv" va Olmaliqning AGMK jamoalari o‘zaro bahs olib borishadi. Uchrashuv soat 16:00da "Paxtakor" stadionida boshlanadi.
O‘yin boshlanishidan oldin va tanaffus vaqtida yurtimizning el suygan san’atkorlari ishtirokida konsert dasturi va turli tadbirlar tashkil etilishi ko‘zda tutilgan. Jumladan, estradamiz yorqin yulduzlari – G‘ayrat Usmonov, Sanjar Holiqov, Otabek Mutalxo‘jayev, Jasur Umirov, “Benom” guruhi, “Afruz” guruhi hamda Lola va Shahzoda ishtirokidagi o‘yinoldi konsert soat 14:30dan boshlab stadionga tashrif buyuruvchi muxlislar e’tiboriga havola etiladi.
Yana bir quvonarli jihat shundaki, ishqibozlar Superkubok o‘yiniga bepul tarzda kirish imkoniyatiga ega bo‘lishadi. O‘yin uchun chiqariladigan chiptalar taklifnoma tarzida “Paxtakor” stadioni kassalarida muxlislarga bepul tarzda taqdim etiladi.
Ta’kidlab o‘tamiz, O‘zbekiston Superkubogi-2019 uchrashuvi Turkiyaning KOC Elektrik AS kompaniyasi bosh homiyligi ostida kechadi.
