Бугун 23 февраль куни Ўзбекистон Суперкубоги учун ўйин бўлиб ўтади. Унда Тошкентнинг "Локомотив" ва Олмалиқнинг АГМК жамоалари ўзаро баҳс олиб боришади. Учрашув соат 16:00да "Пахтакор" стадионида бошланади.
Ўйин бошланишидан олдин ва танаффус вақтида юртимизнинг эл суйган санъаткорлари иштирокида концерт дастури ва турли тадбирлар ташкил этилиши кўзда тутилган. Жумладан, эстрадамиз ёрқин юлдузлари – Ғайрат Усмонов, Санжар Ҳолиқов, Отабек Муталхўжаев, Жасур Умиров, “Беном” гуруҳи, “Афруз” гуруҳи ҳамда Лола ва Шаҳзода иштирокидаги ўйинолди концерт соат 14:30дан бошлаб стадионга ташриф буюрувчи мухлислар эътиборига ҳавола этилади.
Яна бир қувонарли жиҳат шундаки, ишқибозлар Суперкубок ўйинига бепул тарзда кириш имкониятига эга бўлишади. Ўйин учун чиқариладиган чипталар таклифнома тарзида “Пахтакор” стадиони кассаларида мухлисларга бепул тарзда тақдим этилади.
Таъкидлаб ўтамиз, Ўзбекистон Суперкубоги-2019 учрашуви Туркиянинг KOC Elektrik AS компанияси бош ҳомийлиги остида кечади.
