Avval xabar berib o‘tganimizdek, O‘zbekiston kamondan otish federasiyasi Butunjahon etnosport konfederasiyasi bilan yaqindan hamkorlikni yo‘lga qo‘ygan. Bu borada tashkilot bilan qo‘shma loyihalar ishlab chiqilmoqda. Hamkorlik doirasida sentyabr oyida O‘zbekistonda etnosport bo‘yicha katta festival tashkil etilishi rejalashtirilmoqda. Bugun konfederasiya vakillaridan iborat delegasiya Turkiyadan Toshkent shahriga tashrif buyurdi.
Mazkur delegasiya vakillari bilan Milliy olimpiya qo‘mitasida ham uchrashuv tashkil qilindi. Unda O‘zbekiston MOQ prezidenti maslahatchisi Nazirjon Xudoyqulov, O‘zbekiston kamondan otish federasiyasi raisi Otabek Imamov, shuningdek, Turkiyadan tashrif buyurgan mutasaddilar Kuneyt Oztan, Yosin Tutyunju, Nurulla Aslan va Fotih Yildiz ishtirok etdi.
Uchrashuv davomida mehmonlarga O‘zbekiston Milliy olimpiya qo‘mitasi qo‘mitasi, O‘zbekiston kamondan otish federasiyasi faoliyati haqida ma’lumot berildi. Shuningdek, delegasiya vakillariga O‘zbekiston sport yo‘nalishida Turkiya bilan yaqindan hamkorlik qilishga tayyor ekanligi ta’kidlandi. Bundan tashqari sentyabr oyida bo‘lib o‘tishi rejalashtirilayotgan festival yuzasidan muzokaralar olib borildi. Uchrashuv yakunida mehmonlarga esdalik sifatida milliy libosimiz – cho‘ponlar hadya etildi.
Butunjahon etnosport konfederasiyasi vakillari 5 martga qadar yurtimizda bo‘lishadi. Ular mazkur tashrif davomida Xiva hamda Buxoro shaharlariga borishlari kutilmoqda.
