Bu futbolchining transferini bir narsa bilangina izohlash mumkin - Chempionlar Ligasidagi maqsadlar. O‘tgan yilning yozida «PSJ» tekinga 29 yoshli forvard Erik Maksim Chupo-Motingni qo‘lga kiritib, zaxira o‘rindig‘ini biroz kuchaytirdi. Liga 1 doirasida ushbu futbolchi 12ta o‘yin o‘tkazib, bitta gol urdi, shu vaqt mobaynida o‘rtacha har uchrashuvda 32 daqiqa to‘p surdi. Ehtimol, Chupo-Moting yulduzlar soyasida qolib ketayotgandir, ammo «PSJ»ning Chempionlar Ligasida muvaffaqiyat qozonishida asosiy rollardan birini o‘ynashi ehtimoli yo‘q emas. Neymar va Kavanining jarohati Tuxelga boshqa imkon qoldirmayapti - endi murabbiy Erikka e’tibor qaratib, uni tarkibga moslashtirishga majbur bo‘ladi. Fransiyada Chupo-Motingga jiddiy e’tibor qaratishmayapti. Erik maydonga tushganda, uning ishtirokida ko‘plab qiziqarli voqealar kuzatiladi. Zaxirada qolganida ham hammasi nisbatan yaxshiroq kechadi, deyish mushkul.
uw «Bularning bari tushga o‘xshaydi. Jahonning eng yaxshi klublaridan biridaman. Bu yerda ekanligim bilan faxrlanaman. Futbolni yoqtiradiganlarning barchasi «PSJ» singari klubda o‘ynashni orzu qiladi», - deya quvonchini yashirmayapti Chupo-Moting. «Renn»ga qarshi kechgan debyut o‘yinidayoq (3:1) raqib darvozasini ishg‘ol qildi, ammo keyinchalik ishlari yurishmadi. Tribunalardan yangrayotgan hushtak ovozi, muxlislarning mazaxlari, ochkolarning yo‘qotilishi - hozirga qadar Chupo-Moting natijaga ta’sir o‘tkazadigan harakatlarni amalga oshirganicha yo‘q.
uw Joriy mavsum Chupo-Moting ikki marta o‘g‘rilikdan jabr ko‘rdi. «Liverpul»ga qarshi kechgan uchrashuvda Erik zaxiradan o‘yinga qo‘shildi va aynan shu bahs kechayotgan paytda uning uyiga o‘g‘ri tushdi. Mazkur voqeadan ko‘rilgan zarar 600 ming yevroga baholandi, bir necha kundan so‘ng o‘g‘rilik yana takrorlandi. E’tiborlisi, o‘g‘rilar nishoni faqat Chupo-Motingga qaratilmagandi - Tiago Silva ham bir million yevro yo‘qotdi. Ammo vaziyat shunday tus oldiki, «PSJ»dagi yarim yillik faoliyati mobaynida Erik uchun eng esda qolarli voqealar aynan shu o‘g‘rilik bilan bog‘liq bo‘ldi.
uw Transfermarkt Chupo-Motingni 8 million yevroga baholamoqda. Uning «PSJ» a’zosiga aylanishi klub uchun har tomonlama foydali kelishuv bo‘ldi. Qishda Erikni «Beshiktosh»ga sotishlari mumkin edi, ammo uning o‘rniga «PSJ»dan boshqa bir hujumchi ketdi. Iqtidorli Timoti Vea esa ijara asosida «Seltik» safiga qo‘shilib, dastlabki o‘yinida maydonga tushganiga 14 daqiqa bo‘lib ulgurmay gol urdi. Tajribali Chupo-Motingni rotasiya maqsadida tarkibda saqlab qolishdi. Endi esa u faoliyatining eng muhim pallasiga yetib keldi.
uw Chupo-Moting faoliyatining aksar qismini Germaniyada o‘tkazgan, biroq mavsum-2017|2018da Angliyaning «Stok Siti» klubida o‘ynagandi. Erikning statistikasi (5}5) yomon emasdi, ammo jamoa baribir, Chempionshipga tushib ketdi. Ayniqsa, «MYU»ga qarshi bahs Chupo-Moting uchun o‘ziga xos reklama vazifasini o‘tagandi: mahoratli hujumchi mazkur bahsda «dubl» rasmiylashtirgandi. O‘yin 2:2 hisobida yakunlangan, Erik maqtovlarga ko‘milgan, «MYU» himoyachilari esa tanqid qilingandi.
uw Tabiiyki, Chupo-Motingdan «Manchester Yunayted» bilan bo‘ladigan YECHL doirasidagi o‘yin haqida so‘rashdi. «Manchesterliklarda o‘zgarishlari kuzatilmoqda. Hamma yerda murabbiy almashganda bunday holat bo‘lishi tabiiy. Endi har bir futbolchi o‘zini yaxshi tomondan ko‘rsatishga intilmoqda. Ammo boshqa jamoalar bilan ishim yo‘q, biz faqat «PSJ» haqida o‘ylab, o‘zimizga ishonishimiz kerak. Istalgan jamoani mag‘lubiyatga uchratish uchun bizda saviya yetarli, biroq o‘yin qiyin kechishi shubhasiz. «MYU» - ajoyib ijrochilarga ega kuchli jamoa», - dedi Erik.
uw Yozda Chupo-Motingga Tuxel qo‘ng‘iroq qildi. Murabbiyga Erikning aynan o‘sha - «MYU»ga qarshi bahsdagi harakatlari ma’qul kelgan bo‘lishi mumkin edi, lekin «PSJ» ustozi bu futbolchini anchadan beri biladi. Ular «Mayns»da birga ishlashgan, endi esa Tuxel top-loyihada Chupo-Motingdan zaxira varianti sifatida foydalanmoqchi. Ehtimol, murabbiy nimanidir o‘ylab qo‘ygandir, balki Erikning tajribasi Chempionlar Ligasida qo‘l kelishidan umidvordir?! Ammo Chupo-Moting o‘ziga ishonmasa, bunday urinishlardan naf chiqarish mushkul.
