Madridning «Real» klubi yangi bosh murabbiyi Joze Mourinyo «Sporting»ning tayanch yarim himoyachisi Morten Yulmann bilan shartnoma imzolamoqchi. Bu haqda Defensacentral nashri xabar bermoqda.

Manbaning ma’lum qilishicha, «Vest Xem» yarim himoyachisi Mateush Fernandesh transferining amalga oshish ehtimoli pasayganidan so‘ng, Mourinyo Portugaliya chempionati orqali o‘ziga juda yaxshi tanish bo‘lgan Yulmann xaridiga e’tibor qaratgan.

26 yoshli daniyalik futbolchining «Sporting» bilan shartnomasida 88 million yevro miqdorida tovon puli to‘lab sotib olish bandi mavjudligi ta’kidlanmoqda. Biroq xavbekka Madridning «Atletiko» klubi ham jiddiy qiziqish bildirmoqda va ular lissabonliklarga allaqachon 40 million yevrolik taklif yuborishgan.

2025/26 yilgi mavsumda Yulmann barcha musobaqalarni inobatga olgan holda 45 ta uchrashuvda maydonga tushib, uchta gol urdi va oltita golli uzatma muallifiga aylandi.