Hovlingizda yillar davomida sizga shirin mevalar ulashgan biron-bir daraxt borki, bir kun kelib uni kesishga to‘g‘ri kelib qolsa va shunga majbur bo‘lsangiz, oradan qancha vaqt o‘tmasin uning o‘rni baribir bilinadi. O‘rniga boshqa novda o‘tkazganingiz bilan avvalgi mevali daraxtni o‘rnini bosguni qadar albatta ma’lum vaqt kerak bo‘ladi. Ko‘nikish va kutishga majbur bo‘lasiz.
O‘zbek futbolida bir jamoa borki, xuddi o‘sha mevali daraxt kabi o‘z muxlislariga xursandchilik ulashar, futbolimizda intrigani oshirib ko‘p yillar davomida gegemonlik qilar va afsuski hozirda Pro-ligada to‘p surishga majbur bo‘layotgan bu jamoaning futbolimiz tarixida o‘z o‘rni bor. O‘zbekistonning 5 karra chempioni bo‘lgan va uzoq yillar davomida sovrindorlar qatorida bo‘lib kelgan Farg‘onaning «Neftchi» jamoasi so‘nggi yillarni juda bo‘sh o‘tkazishi oqibatida Superliga bilan xayrlashishga majbur bo‘ldi.
Eng achinarlisi esa, iqtidorlar maskani bo‘lgan vodiyning eng sovrindor jamoasi avvalgi mavqeini boy berib qo‘ydi. O‘zbekiston chempionati boshlanganidan beri hali biron marta quyi ligaga tushib ketgan uch jamoaning biri ham «Neftchi» edi. «Buyuk chinorlar»dan tashqari yana ikki klub «Paxtakor» hamda «Navbahor» ham shu kunga qadar quyi ligaga tushib ketishmagan. Biroq «Neftchi»dek jamoaning Pro-ligada to‘p surishiga haligacha ishongimiz kelmaydi.
Shiddatli «Vodiy derbi»lari, poxtaxtning grand klublari bilan tengma-teng kurash olib borishlar, klub tarixida o‘tgan asrning yorqin yulduzlari bo‘lgan Afzal Azizov, Stepan Atoyan, Ravshan Bozorov, Asad Do‘rmonov, Rustam Do‘rmonov, Sergey Zavalnyuk, Sergey Lebedev, Andrey Miklyayev, Vladimir Radkevich, Andrey Rezansev, Aleksandr Tixonov va Andrey Fedorov kabi futbolchilarning ajoyib o‘yinlari, jamoa tarixidagi eng sovrindor sobiq bosh murabbiy Yuriy Sarkisyanning o‘yin paytidagi reaksiyalari, bundan tashqari yaqin o‘tmishning nomdor futbolchilari bo‘lgan Sergey Ni, Anvar Berdiyev, Maksim Usmonov, Sanjar Asqaraliyev, Abdumajid Toirov, Mansur Saidov kabi futbolchilarning yorqin o‘yinlari, Iqbol Akramovning qanotdagi reydlari, Akmal Xolmatovning jarima zarbalaridan kiritgan shedevr gollari haliveri ko‘z oldimizdan ketmasa kerak.
Namangan hamda Farg‘onadagi derbilarni-ku aytmay qo‘yaqolaylik. O‘yindagi muhit, muxlislar bilan to‘lib toshgan stadionning g‘uvillashlari, uchrashuvning har bir daqiqasidagi keskin kurashlarni sog‘inib eslaymiz. Sobiq bosh murabbiy Yuriy Vazgenivochning «Neftchi»sida o‘zgacha shiddat, o‘yinlarida o‘zgacha mazmun bor edi. Legionarlarsiz, mahalliy futbolchilar bilan yuksak marralarni ko‘zlab unga erisha olgan bu murabbiy, yoshlarni kashf qilishni do‘ndirardi. Ming afsuski, u paytlardagi «Neftchi»ni oxirgi yillarda unutib qo‘ygandik.
Umid qilamizki, Farg‘ona jamoasi yana tez fursatda Superligaga qaytadi va avvalgi mavqeini tiklab, yurtimiz sha’nini OCHL bahslarida munosib himoya qiladi. Biz «Neftchi»ning va u bilan o‘tgan avvalgi derbilarni juda sog‘indik. Namanganlik muxlislar nomidan farg‘onalik muxlislarga tilagimiz, bo‘shashmanglar! «Neftchi» hozir hammadan ham ko‘ra sizning qo‘llab-quvvatlashingizga muxtojdir. Sizning ko‘magingiz esa jamoani yana kuchlilar safiga qaytaradi. Ishonamizki, «Neftchi» hali o‘z so‘zini aytadi.
