Ҳовлингизда йиллар давомида сизга ширин мевалар улашган бирон-бир дарахт борки, бир кун келиб уни кесишга тўғри келиб қолса ва шунга мажбур бўлсангиз, орадан қанча вақт ўтмасин унинг ўрни барибир билинади. Ўрнига бошқа новда ўтказганингиз билан аввалги мевали дарахтни ўрнини босгуни қадар албатта маълум вақт керак бўлади. Кўникиш ва кутишга мажбур бўласиз.
Ўзбек футболида бир жамоа борки, худди ўша мевали дарахт каби ўз мухлисларига хурсандчилик улашар, футболимизда интригани ошириб кўп йиллар давомида гегемонлик қилар ва афсуски ҳозирда Про-лигада тўп суришга мажбур бўлаётган бу жамоанинг футболимиз тарихида ўз ўрни бор. Ўзбекистоннинг 5 карра чемпиони бўлган ва узоқ йиллар давомида совриндорлар қаторида бўлиб келган Фарғонанинг «Нефтчи» жамоаси сўнгги йилларни жуда бўш ўтказиши оқибатида Суперлига билан хайрлашишга мажбур бўлди.
Энг ачинарлиси эса, иқтидорлар маскани бўлган водийнинг энг совриндор жамоаси аввалги мавқеини бой бериб қўйди. Ўзбекистон чемпионати бошланганидан бери ҳали бирон марта қуйи лигага тушиб кетган уч жамоанинг бири ҳам «Нефтчи» эди. «Буюк чинорлар»дан ташқари яна икки клуб «Пахтакор» ҳамда «Навбаҳор» ҳам шу кунга қадар қуйи лигага тушиб кетишмаган. Бироқ «Нефтчи»дек жамоанинг Про-лигада тўп суришига ҳалигача ишонгимиз келмайди.
Шиддатли «Водий дерби»лари, похтахтнинг гранд клублари билан тенгма-тенг кураш олиб боришлар, клуб тарихида ўтган асрнинг ёрқин юлдузлари бўлган Афзал Азизов, Степан Атоян, Равшан Бозоров, Асад Дўрмонов, Рустам Дўрмонов, Сергей Завальнюк, Сергей Лебедев, Андрей Микляев, Владимир Радкевич, Андрей Резанцев, Александр Тихонов ва Андрей Федоров каби футболчиларнинг ажойиб ўйинлари, жамоа тарихидаги энг совриндор собиқ бош мураббий Юрий Саркисяннинг ўйин пайтидаги реаксиялари, бундан ташқари яқин ўтмишнинг номдор футболчилари бўлган Сергей Ни, Анвар Бердиев, Максим Усмонов, Санжар Асқаралиев, Абдумажид Тоиров, Мансур Саидов каби футболчиларнинг ёрқин ўйинлари, Иқбол Акрамовнинг қанотдаги рейдлари, Акмал Холматовнинг жарима зарбаларидан киритган шедевр голлари ҳаливери кўз олдимиздан кетмаса керак.
Наманган ҳамда Фарғонадаги дербиларни-ку айтмай қўяқолайлик. Ўйиндаги муҳит, мухлислар билан тўлиб тошган стадионнинг ғувиллашлари, учрашувнинг ҳар бир дақиқасидаги кескин курашларни соғиниб эслаймиз. Собиқ бош мураббий Юрий Вазгенивочнинг «Нефтчи»сида ўзгача шиддат, ўйинларида ўзгача мазмун бор эди. Легионарларсиз, маҳаллий футболчилар билан юксак марраларни кўзлаб унга эриша олган бу мураббий, ёшларни кашф қилишни дўндирарди. Минг афсуски, у пайтлардаги «Нефтчи»ни охирги йилларда унутиб қўйгандик.
Умид қиламизки, Фарғона жамоаси яна тез фурсатда Суперлигага қайтади ва аввалги мавқеини тиклаб, юртимиз шаънини ОЧЛ баҳсларида муносиб ҳимоя қилади. Биз «Нефтчи»нинг ва у билан ўтган аввалги дербиларни жуда соғиндик. Наманганлик мухлислар номидан фарғоналик мухлисларга тилагимиз, бўшашманглар! «Нефтчи» ҳозир ҳаммадан ҳам кўра сизнинг қўллаб-қувватлашингизга мухтождир. Сизнинг кўмагингиз эса жамоани яна кучлилар сафига қайтаради. Ишонамизки, «Нефтчи» ҳали ўз сўзини айтади.
