Xabaringiz bor, 2018 yilgi mavsum avvalida Professional futbol ligasi sovrinli o‘rinlarni egallagan futbol klublariga ma’lum miqdorda mukofot pullari va’da qilgan edi.

Toshkentning “Paxtakor” futbol klubi O‘zbekiston Superligasi 2018 yilgi mavsumi yakunlariga ko‘ra 2-o‘rinni egalladi. Qolaversa, klubning futzal jamoasi mamlakat chempionatida kumush medallarga ega chiqdi.  

Bungacha Professional futbol ligasi klublar bo‘ynidagi qarzdorlik masalalari hal bo‘lishiga qarab, rag‘batlantiruvchi mukofot pullarini o‘tkazib borishni rejalashtirgandi.

“Paxtakor” klubi mavjud qarzdorliklarini to‘liq bartaraf etdi. Qolaversa, akademiya va maydon bo‘yicha talablar bajarildi. Natijada ushbu klubda qolib kelayotgan va O‘zPFLga ma’lum bo‘lgan qarzdorlik masalasi yo‘q.

Shu boisdan “Paxtakor” klubi birinchilardan bo‘lib mukofot pullarini qabul qilib oldi. Klub hisobiga Superligada 2-o‘rinni egallagani uchun 800 million so‘m, shuningdek, futzal jamoasi mamlakat chempionatida 2-o‘rinni qo‘lga kiritgani uchun 200 million so‘m o‘tkazib berildi.  

Qayd etish joiz, O‘zbekiston Professional futbol ligasi qolgan barcha klublarga ham va’da qilingan mukofot pullarini bosqichma-bosqich o‘tkazib berish bo‘yicha muzokaralar olib bormoqda.