“Lokomotiv” 11 mart kuni Osiyo chempionlar ligasida 2-tur uchrashuvini o‘tkazadi.

Jamoa kecha, 8 mart kuni “Paxtakor”ga qarshi Superliganing dastlabki turida maydonga tushishi lozim edi. Biroq PFL har ikki jamoani OCHLda muhim bahs kutib turganini inobatga olib o‘yinni 16 martga qoldirdi. Natijada “Lokomotiv”ning rejalari biroz o‘zgardi va jamoa mashg‘ulot orqali OCHL bahsiga tayyorgarlikni boshladi.

Endi “temiryo‘lchilar” 11 mart kuni Dohada OCHL 2-tur doirasida “Ar-Rayyan”ga qarshi maydonga tushishadi. Mazkur bellashuv mahalliy vaqt bilan 18:35 (Toshkent vaqti bilan 20:35)da start oladi. Jamoa a’zolari ertaga ertalab charter reys orqali Qatar poytaxti sari parvoz qilishadi. Ertaga kun tartibidan o‘yinoldi matbuot anjumani, miting hamda rasmiy mashg‘ulot o‘rin olgan.

Bugun “Lokomotiv” futbolchilari asosiy maydonda mashg‘ulot o‘tkazishdi. Birozdan so‘ng mashg‘ulotdan fotosuratlarni e’tiboringizga havola etamiz. Jamoamiz dushanba kuni “Ar-Rayyan”ga qarshi o‘ynab bo‘lganidan so‘ng yana charter reys bilan Toshkentga qaytib keladi va 16 mart kuni bo‘ladigan “Paxtakor” bilan o‘yinga hozirlikni boshlaydi.

OCHL. Guruh bosqichi. 2-tur. 11 mart
“AR-RAYYAN” (Qatar) – “LOKOMOTIV” (O‘zbekiston)
Stadion: “Jassim bin Hamad” (Jassim Bin Hamad Stadium)
Boshlanish vaqti: 20:35 (Toshkent vaqti bilan)

“Lokomotiv” PFK matbuot xizmati.