Professional boksning yarim o‘rta (-66,68 kg) vazn toifasida ringga chiqayotgan o‘zbekistonlik Sanjarbek Rahmonov (11-1-1, 5 KO) aprel oyida o‘zining navbatdagi jangini o‘tkazadi.
Floyd Meyvezerning Mayweather Promotions promouterlik kompaniyasi tarkibida mashg‘ulotlar olib borayotgan Rahmonov 5 aprel kuni amerikalik Kit Hanterga (9-0, 7 KO) qarshi ringga chiqadi. Jang Sanjar Rahmonov uchun qadrdon bo‘lib qolgan Las-Vegasdagi Samʼs Town Hotel & Gambling Hall saroyida bo‘lib o‘tadi. So‘nggi beshta jangini Sanjarbek aynan shu arenada o‘tkazgan.
Eslatib o‘tamiz, Rahmonov so‘nggi marta 7 dekabr kuni Jonatan Stilga (9-2-1, 6 KO) qarshi ringga chiqib, raqibini ochkolar hisobiga ko‘ra mag‘lubiyatga uchratgandi.