Xabar berganimizdek, bugun poytaxtimizda o‘zbek yengil atletikasi tarixida ilk bor yarim marafon o‘tkazildi. Xalqaro maqomga ega bo‘lgan ushbu yirik sport tadbirida dunyoning 28 mamlakatidan 1700 nafarga yaqin sportchi ishtirok etdi.
Yuqori saviyada tashkil qilingan musobaqaning tantanali ochilish marosimida Osiyo yengil atletika federasiyasi rahbari Daxlan Al Hamad ham ishtirok etib, yurtimizda bunday marafonning tashkil qilinayotgani sog‘lom turmush tarzi va ushbu sport turining yana bir pog‘ona ko‘tarilayotganidan dalolat ekanini alohida ta’kidlab o‘tdi. Shuningdek, O‘zbekiston Milliy Olimpiya qo‘mitasi nomidan Bosh kotib Jasur Matchanov o‘z fikrlarini bildirib o‘tdi.
“Musobaqa juda ham yuqori saviyada tashkil qilinmoqda. Bunday marafon sportni sevadigan har qanday inson uchun katta bayram. Xalqaro yarim marafonni kelajakda an’anaviy tarzda tashkillashtirmoqchimiz va bunday g‘oya, o‘ylaymanki, muxlislarda, aholimiz o‘rtasida yanada katta qiziqishga sabab bo‘ladi”, – dedi Jasur Matchanov.
Marafonda havaskorlar qatorida boshqa sport turlaridagi nomdor atletlarimiz ham o‘z omadini sinab ko‘rishdi. Jumladan, ular orasida taekvondo bo‘yicha jahon chempioni Dmitriy Shokin, boks bo‘yicha Osiyo o‘yinlari chempioni va ayni paytda professional boksda yorqin janglar olib borayotgan Isroil Madrimov kabi yulduz sportchilarimiz ham bor. Tashkilotchilar yig‘ilgan mehmonlar va ishtirokchilarga “Navro‘z” shukuhini ulashish maqsadida sayl ham uyushtirishdi.
Natijalarga to‘xtalib o‘tadigan bo‘lsak, erkaklar o‘rtasidagi yarim marafonda marra chizig‘ini birinchi bo‘lib xitoylik sportchi Li Yang kesib o‘tdi.
Ayollar o‘rtasida esa qirg‘izistonlik Darya Maslova birinchi o‘rinni qo‘lga kiritdi. Hamyurtlarimiz Sitora Hamidova hamda Yekaterina Tunguskova mos ravishda ikkinchi va uchinchi bo‘lib finishga yetib kelishdi.
Toshkent xalqaro yarim marafoni, erkaklar
1. Li Yang (Xitoy) – 1:04:43
2. Adilet Kishtambekov (Qirg‘iziston) – 1:05:03
3. Andrey Petrov (O‘zbekiston) – 1:05:20
Toshkent xalqaro yarim marafoni, ayollar
1. Darya Maslova (Qirg‘iziston) – 1:12:30
2. Sitora Hamidova (O‘zbekiston) – 1:13:56
3. Yekaterina Tunguskova (O‘zbekiston) – 1:16:13
G‘olib va sovrindorlarni taqdirlash marosimida O‘zbekiston Respublikasi Prezidentining yoshlar, fan, ta’lim, sog‘liqni saqlash va sport masalalari bo‘yicha maslahatchisi Abdujabbor Abduvoxidov va Osiyo yengil atletika federasiyasi prezidenti Daxlan Al Hamad ishtirok etib, marafon yuqori saviyada tashkillashtirilganini yana bir karra alohida ta’kidlab o‘tishdi. Shundan so‘ng estradamiz yulduzlari ishtirokidagi kuy-qo‘shiqlar yig‘ilgan muxlislar e’tiboriga havola qilindi.
