Xabaringiz bor, Superliganing 2-tur bahsini “Lokomotiv” o‘z maydonida o‘tkazadi.

30 mart kuni “Lokomotiv” stadionida kechadigan bellashuvda “temiryo‘lchilar” “Navbahor”ni qabul qiladi. Hozirda bu o‘yinga “Lokomotiv” jiddiy tayyorgarlik ko‘rmoqda. “Navbahor” bilan kechadigan bahs ayniqsa jamoa yarim himoyachisi Sardor Mirzayev uchun muhim ahamiyat kasb etadi.

Negaki Sardor Mirzayev uchun bu o‘yin “Lokomotiv” safidagi 100-uchrashuv bo‘ladi. Kecha tunda terma jamoamiz bilan Xitoydan qaytib kelgan Mirzayev bugundan “Loko” tarkibida Superliga 2-turiga tayyorgarlikni boshlaydi.

Ma’lumot uchun, 2009 yil “Neftchi” safida oliy ligada debyut qilgan Sardor Mirzayev 2014 yil “Lokomotiv”ga kelib qo‘shilgan va birinchi davrada bitta o‘yinda maydonga tushgan. Ikkinchi davra arafasida esa u “Neftchi”ga ijaraga berilgan. Mirzayev 2015 yildan beri muntazam “Lokomotiv”da to‘p tepib kelyapti va shu paytgacha oliy liga (Superliga) doirasida jami 99ta o‘yinda ishtirok etgan.

U 2014 yil 1ta, 2015 yil 10ta, 2016 yil 27ta, 2017 yil 30 va 2018 yil ham 30ta bellashuvda maydonga tushgan. Bu yil hisobidan esa hozircha 1-turda “Paxtakor”ga qarshi to‘p tepdi. Va mana endi Mirzayev o‘zining yubiley bahsiga tayyorgarlik ko‘rmoqda.