O‘zbekistonning amaldagi chempionlari bu mavsumni anchagina bo‘sh boshlashdi. Buni ko‘plab muxlislar asosiy tarkib futbolchilarinng boshqa klubga o‘tib ketgani bilan bog‘lagan bo‘lsa, ba’zilar rotasiyaning yo‘qligini sabab qilib ko‘rsatmoqda. Qisqasi, bugun amaldagi chempion klubimiz haqida…

Asosiy tarkib uchun raqobat yo‘q

Sardor Mirzayev, Xusniddin G‘ofurov, Islom To‘xtaxo‘jayev, Temurxo‘ja Abduxoliqov, Alisher Shog‘ulomov,Diyor Turopov, Shuhrat Muhammadiyev… Bu futbolchilar mana bir necha yillardan beri «Temir yo‘lchilar» sharafini himoya qilib kelmoqda… Ularning aksariyati terma jamoa darajasiga chiqa olmagan bo‘lsada, moliyaviy baquvvat klubdan yaxshigina maosh olishadi. Avvalambor, omadlarini bersin, ammo bu ularning ziyoniga ishlamoqda. Bu futbolchilarda motivasiya qolmagandek go‘yo?! Yuqorida sanab o‘tilgan futbolchilarning oxirgi marotaba qachon ko‘zi yonib maydonda to‘p surganini to‘g‘risi, hozir eslay olmayman.

Achinarlisi shundaki, o‘z vaqtida butun O‘zbekistonning umidiga aylangan yigitlar hozirda o‘zlarining soyalarida qolib ketishmoqda… Klub rotasiyaga e’tiborni kamroq qaratgani uchun so‘nggi 5 mavsumda jamoa birorta yosh futbolchini kashf eta olmadi. Bu yukni  «Nasaf» va «Bunyodkor» allaqachon o‘z bo‘yniga olib bo‘lgani yetmagandek, yoshlarga tayangan klublar kichik byudjet bilan ham istalgan raqibni yenga oladigan jangovar jamoaga aylangan bir paytda, «Lokomotiv»dek qudratli klub o‘zbek futboli rivoji uchun birorta yangi nomni kashf etmagani kishini o‘ylantirib qo‘yadi… Rotasiyaga urg‘u bermagan jamoada to‘p surgan futbolchilar asosiy tarkibdagi joyini yo‘qotib qo‘yishdan sira cho‘chimay maydonda to‘p surgani sabablimi, yoki boshqa faktorlar evaziga xalqaro arenalarda g‘alaba qozonishi shart bo‘lgan uchrashuvlarda ochko yo‘qotayotgan «Lokomotiv»ning o‘yinlarida o‘sish kuzatilmayapti... Ming afsuski, «Temir yo‘lchilar»ning OCHL dagi omadsiz yurishlari evaziga kvotalarimiz qisqarib bormoqda. Ichki chempionatimizda OCHL da ishtirok etuvchi klublar sonini oshirib olishni uddasidan chiqa olsak, bu terma jamoamiz uchun ham, «Super Liga» uchun ham foydadan xoli bo‘lmas edi.

Ketganlar kelganlardan ancha kuchliroq edi

Mavsum boshida «Lokomotiv» jamoasini yelkasida ko‘tarib yurgan Bikmayev, Aliboyev, Abdullayev, Nesterov singari futbolchilarni jamoada olib qolmagani yetmagandek, ularning o‘rnini bosa oladigan futbolchilarni harid qila olmadi.  Jamoaga hozir Aliboyev singari kreativ futbolchi yetishmayotgan bo‘lsa, Bikmayevning o‘rnini bosishi kerak bo‘lgan futbolchi zahirada qolib ketyapti. Afsuski, «Lokomotiv» bu mavsum chempionlik uchun kurashda «Paxtakor»ga hozirgi tarkibi bilan yetarlicha qarshilik ko‘rsata olmasligi aniq bo‘lib bormoqda. Bu esa, o‘z-o‘zidan «Super Liga»dagi intriganing yo‘qolishiga sabab bo‘lsa, ajab emas…

Sifatsiz legionerlar

Legioner futbolchilar mahalliy futbolchilarga  nisbatan bir bosh baland bo‘lishi shart, aks xolda, ularni jamoaga taklif etishdan ma’ni yoq.
Bu mavsumda OCHL havosidan nafas olmagan, tajribasiz Jokich, Amanov, Rayevatslarning harid qilinishi «Loko»ning o‘yinini kuchaytirmasligi kundek ravshan edi. O‘zbekiston chempioni sifatida klublar o‘rtasidagi qit’amizdagi eng nufuzli turnirda yurtimiz sharafini himoya qilayotgan jamoa uchun bu trasnferlar nima uchun kerak bo‘ldi ekan?! To‘g‘risi, tushunish qiyin.

O‘yindagi kamchiliklar

Jamoa asosiy e’tiborni qanotlarga qaratmoqda va hujumlarning deyarli 80% qanotlardan vujudga kelmoqda. Bu yaxshi, ammo raqib bu uslubni tezda o‘qib olib qarshi choralar koradigan bo‘lsa, «Lokomotiv»da «B» reja yo‘q ekanligi pand berib qo‘ymoqda. Bundan avvalgi mavsumda Ikrom Aliboyev qanotlarni raqiblar berkitgan paytida markazdan ajoyib hujumlar boshlab turar va bu urunish ko‘p xollarda gol bilan yakunlar edi. Xozirda, markazda o‘ynayotgan futbolchlarda ijodkorlik yetishmayapti. Jamoaning markazdan uyushtiriladigan hujumlariga javob berishi kutilalayotgan Iskenderov esa hali to‘liq sport formasini tiklab olganicha yo‘q. Shunday ekan, afsuski, «Lokomotiv» «B» rejasidan foydalanishni istagan taqdirda ham ijrochilar yo‘qligi pand bermoqda.

Xulosa

Umumiy qilib aytganda, jamoada kechiktirmasdan qilinishi kerak bo‘lgan ishlar yig‘ilib qolgan.Mavsum oralig‘ida jamoa yangi futbolchilar bilan tarkibini kuchaytirib olishi shart. Aks xolda, OCHL da ham «Super Liga»da ham ijobiy natija ko‘rsatishdan umid qilmasa ham bo‘ladi. «Lokomotiv» o‘yinni o‘z qo‘liga ola biladigan futbolchilarga muhtoj. «Temir yo‘lchilar»ning OCHLda joylashgan guruhi «Paxtakor»nikidan biroz kuchsizroq deyish noto‘g‘ridek, ammo «Loko» anchadan beri bu qadar qulay guruhga tushmagan edi. Afsuski, «Al Ittihod»ga qarshi bo‘m-bo‘sh stadionda kechgan uchrashuvdagi mag‘lubiyat imkoniyatlarni biroz pasaytirib yubordi. Endi qolgan o‘yinlarning har biri finalga teng bo‘ladi. Shunday ekan, buyog‘iga «Lokomotiv» ortida turgan o‘zbek xalqi va futbolimiz sha’ni uchun ham ikki hissa mas’uliyat bilan maydonga tushmog‘i darkor. Oldinda butun boshli ichki chempionat va OCHLning ikkinchi davrasi bor. Yo‘qotilgan ochkolarni jamg‘arish va kurashga qaytishning ayni payti.

Yahyoxo‘ja Ulug‘xo‘jayev