Superliga 4-turida "Paxtakor" Termizda "Surxon" mehmoni bo‘ladi.

Jamoamiz turnir jadvalida peshqadamlik qilayotgan bo‘lsa, mezbonlar 7 ochko jamg‘argan holda ikkinchi pog‘onadan o‘rin olishgan. Shu sababli "Sherlar" ishtirokidagi bellashuv yana bir bor turning markaziy o‘yini maqomida kechadi.

Jamoamiz "Surxon" bilan oxirgi marta 2004 yil, bundan 15 yil avval kuch sinashgandi. Shu tariqa "Paxtakor" 15 yillik tanaffusdan keyin Termizga yana chempionat doirasida bellashuv o‘tkazish uchun tashrif buyuradi.

Hozirga qadar jamoalar chempionatlar doirasida 24 bahsda to‘qnash kelishgan. Ularning 19tasida "Paxtakor", 5tasida "Surxon" zafar quchgan. Biror marta durang natija qayd etilmagan. Raqib darvozasini 80 marta ishg‘ol qilgan "Sherlar" 24 to‘p o‘tkazib yuborishgan. Termizdagi o‘yinlarda 8 g‘alaba va 4 mag‘lubiyatga egamiz. Gollar nisbati 25ga 17ni tashkil qiladi. Jami 12 g‘alaba yirik hisoblarda qo‘lga kiritilgan. Eng yirik natija - 8:0 bo‘lib, 2004 yilgi mavsumda kuzatilgan.

Jamoalar safida kartochkalar bilan bog‘liq diskvalifikasiya sababli o‘yinni o‘tkazib yuboradigan futbolchilar yo‘q.

"Surxon" va "Paxtakor" jamoalari o‘rtasidagi uchrashuv 14 aprel, yakshanba kuni Termizdagi "Alpomish" stadionida soat 16:15da start oladi