Xabaringiz bor, Osiyo chempionlar ligasi doirasida yurtimiz sharafini himoya qilayotgan ikki klubimiz 22-aprel sanasida 4-tur doirasida maydonga tushishadi. Bugun shu haqida qisqacha
«Paxtakor»
Arveladze shogirdlari Toshkentda «As Saad» bilan durang qayd etganiga qaramasdan, guruhda peshqadamlik qilib kelmoqda. «Sherlar» ikkinchi davraning ikkita uchrashuvini mehmonda o‘tkazishlariga to‘gri kelishini hisobga olsak, ular navbatdagi turda mag‘lubiyatga uchramasliklari shart. To‘g‘ri, raqib kuchli, ammo «sherlar» guruhdan chiqishni istashsa, Qatar chempionidan ochko tortib olishlari talab etiladi. Agarda «Paxtakor» g‘alaba bilan qaytadigan bo‘lsa, guruhda birinchi o‘rin uchun anchagina jiddiy qadam tashlagan bo‘ladi. Jamoani 22-aprelda safar uchrashuvi kutib turgan bo‘lsa, 6-may sanasida Toshkentda Eronning «Persapolis» klubini mehmon qiladi. Guruhdagi so‘nggi turni mehmondagi uchrashuv bilan yakunlaydigan «Paxtakor»ning raqibi «Al Ahli» klubi bo‘ladi. Guruhda anchagina jiddiy klublar yig‘ilganini inobatga olsak, guruhdan chiqish uchun kurash so‘nggi turgacha davom etadigandek ko‘rinmoqda.
«Lokomotiv»
«Temir yo‘lchilar» 22-aprel sanasida o‘z uyida «Al Ittihad» klubini qabul qiladi. O”zbekiston chempionining ishlari maqtagulik ahvolda emas. Ular 3 ochko bilan guruhda so‘nggi pog‘onada borishmoqda. Jamoa «Al Ittihad» bilan bo‘lgan uchrashuvda so‘nggi daqiqalarda o‘tkazib yuborilgan gol evaziga mag‘lubiyatga uchradi. O‘zi shundoq ham bu mavsumda oldingisiga nisbatan ancha sust ishtirok etayotgan «Loko»da muammolar yetarlicha. «Loko» ikkinchi davraning ikkita uchrashuvini o‘z uyida o‘tkazishi imkoniyatlarimizni biroz oshirishi mumkin. Buyo‘g‘iga «Lokomotiv» uchun ortga yo‘l yo‘q. 6-may sanasida «Al Vahda» klubi mehmoni bo‘ladigan «temir yo‘lchilar» 21-may kuni o‘z uyida «Al Rayyan» klubiga qarshi maydonga tushadi.
Klublarimizga yaqinlashib kelayotgan o‘ta muhim uchrashuvlarda omad va zafarlar tilab qolamiz.
