Хабарингиз бор, Осиё чемпионлар лигаси доирасида юртимиз шарафини ҳимоя қилаётган икки клубимиз 22-апрел санасида 4-тур доирасида майдонга тушишади. Бугун шу ҳақида қисқача
«Пахтакор»
Арвеладзе шогирдлари Тошкентда «Ас Саад» билан дуранг қайд этганига қарамасдан, гуруҳда пешқадамлик қилиб келмоқда. «Шерлар» иккинчи давранинг иккита учрашувини меҳмонда ўтказишларига тўгри келишини ҳисобга олсак, улар навбатдаги турда мағлубиятга учрамасликлари шарт. Тўғри, рақиб кучли, аммо «шерлар» гуруҳдан чиқишни исташса, Қатар чемпионидан очко тортиб олишлари талаб этилади. Агарда «Пахтакор» ғалаба билан қайтадиган бўлса, гуруҳда биринчи ўрин учун анчагина жиддий қадам ташлаган бўлади. Жамоани 22-апрелда сафар учрашуви кутиб турган бўлса, 6-май санасида Тошкентда Эроннинг «Персаполис» клубини меҳмон қилади. Гуруҳдаги сўнгги турни меҳмондаги учрашув билан якунлайдиган «Пахтакор»нинг рақиби «Ал Аҳли» клуби бўлади. Гуруҳда анчагина жиддий клублар йиғилганини инобатга олсак, гуруҳдан чиқиш учун кураш сўнгги тургача давом этадигандек кўринмоқда.
«Локомотив»
«Темир йўлчилар» 22-апрел санасида ўз уйида «Ал Иттиҳад» клубини қабул қилади. О”збекистон чемпионининг ишлари мақтагулик аҳволда эмас. Улар 3 очко билан гуруҳда сўнгги поғонада боришмоқда. Жамоа «Ал Иттиҳад» билан бўлган учрашувда сўнгги дақиқаларда ўтказиб юборилган гол эвазига мағлубиятга учради. Ўзи шундоқ ҳам бу мавсумда олдингисига нисбатан анча суст иштирок этаётган «Локо»да муаммолар етарлича. «Локо» иккинчи давранинг иккита учрашувини ўз уйида ўтказиши имкониятларимизни бироз ошириши мумкин. Буйўғига «Локомотив» учун ортга йўл йўқ. 6-май санасида «Ал Ваҳда» клуби меҳмони бўладиган «темир йўлчилар» 21-май куни ўз уйида «Ал Райян» клубига қарши майдонга тушади.
Клубларимизга яқинлашиб келаётган ўта муҳим учрашувларда омад ва зафарлар тилаб қоламиз.
