Oradan 3 kun o‘tib «Manchester Siti» va «Tottenxem» jamoalari bu safar Angliya premyer-ligasi doirasida to‘qnash kelishdi.

Har ikkala jamoa murabbiylari bu o‘yin uchun aralash tarkibni tushirishdi. Bahsning 5-daqiqasidayoq "shaharliklar"ning 18 yoshli hujumchisi Filip Foden hisobni ochishga muvaffaq bo‘ldi. U Aguero tomonidan yetkazilgan uzatmani bosh bilan darvozaning bo‘sh qolgan qismiga joylab qo‘ydi.

Bu uchrashuv YECHLda bo‘lgani kabi xavfli vaziyatlarga boy bo‘lmadi. Ammo har ikkala jamoa golga tortadigan hujumlar tashkil qilishdi. O‘yinning 15-daqiqasida Eriksen yakkama-yakka vaziyatga chiqib, "Siti" posbonini dog‘da qoldira olmagan bo‘lsa, oradan 2 daqiqa o‘tib Lyaport Son Xeung Minga darvozani ishg‘ol qilishiga xalal berib qoldi.

Ikkinchi bo‘limda esa eng xavfli vaziyat Sterlingda bo‘ldi. Bahsning 72-daqiqasida Leroy Sane chap qanotdan jarima maydonchasi kirib, shunday uzatma berdiki, to‘p darvozabon maydonchasi chizig‘i ustida turgan Rahimga kelib tushdi. Uning zarbasini darvozabon oyog‘i bilan qaytarib qoldi!

"Tottenxem" o‘yin so‘ngida hisobni tenglashtirish uchun bosim uyushtirdi, ammo "shaharliklar" yaxshi himoyalanib, g‘alabani ushlab qolishdi.

Shu tariqa, "Manchester Siti" YECHLdagi muvaffaqiyatsizlik uchun ushbu raqibdan qasos oldi. Gvardiola jamoasi o‘z ochkolarini 86taga yetkazib, jadvalda 1-o‘ringa ko‘tarilib oldi. "Arsenal" esa ertaga "Xaddersfild"ni mag‘lub etsa, "shporlar"dan oldinga o‘tib ketishi mumkin.

APL, 35-tur
Manchester Siti – Tottenxem 1:0 (1:0, 0:0)
Gol: 1:0 – 5 Foden.
Manchester Siti – Ederson, Stounz, Laport, Uoker, Zinchenko, Gyundogan, de Bryuyne (Fernandinyo, 38), Bernardu Silva, Foden (Silva, 85), Sterling, Aguero (Sane, 66).
Tottenxem – Gassaniga, Devis, Vertongen, Alderveyreld (Lyorente, 78), Foyt, Lukas Moura, Dayer (Vanyama, 61), Eriksen, Alli (Rouz, 69), Sanches, Son Xin Min.
Ogohlantirishlar: Vanyama (86), Sterling (90), Vertongen (90).