Орадан 3 кун ўтиб «Манчестер Сити» ва «Тоттенхэм» жамоалари бу сафар Англия премьер-лигаси доирасида тўқнаш келишди.

Ҳар иккала жамоа мураббийлари бу ўйин учун аралаш таркибни туширишди. Баҳснинг 5-дақиқасидаёқ "шаҳарликлар"нинг 18 ёшли ҳужумчиси Филип Фоден ҳисобни очишга муваффақ бўлди. У Агуэро томонидан етказилган узатмани бош билан дарвозанинг бўш қолган қисмига жойлаб қўйди.

Бу учрашув ЕЧЛда бўлгани каби хавфли вазиятларга бой бўлмади. Аммо ҳар иккала жамоа голга тортадиган ҳужумлар ташкил қилишди. Ўйиннинг 15-дақиқасида Эриксен яккама-якка вазиятга чиқиб, "Сити" посбонини доғда қолдира олмаган бўлса, орадан 2 дақиқа ўтиб Ляпорт Сон Хеунг Минга дарвозани ишғол қилишига халал бериб қолди.

Иккинчи бўлимда эса энг хавфли вазият Стерлингда бўлди. Баҳснинг 72-дақиқасида Лерой Сане чап қанотдан жарима майдончаси кириб, шундай узатма бердики, тўп дарвозабон майдончаси чизиғи устида турган Раҳимга келиб тушди. Унинг зарбасини дарвозабон оёғи билан қайтариб қолди!

"Тоттенхэм" ўйин сўнгида ҳисобни тенглаштириш учун босим уюштирди, аммо "шаҳарликлар" яхши ҳимояланиб, ғалабани ушлаб қолишди.

Шу тариқа, "Манчестер Сити" ЕЧЛдаги муваффақиятсизлик учун ушбу рақибдан қасос олди. Гвардиола жамоаси ўз очколарини 86тага етказиб, жадвалда 1-ўринга кўтарилиб олди. "Арсенал" эса эртага "Хаддерсфилд"ни мағлуб этса, "шпорлар"дан олдинга ўтиб кетиши мумкин.

АПЛ, 35-тур
Манчестер Сити – Тоттенхэм 1:0 (1:0, 0:0)
Гол: 1:0 – 5 Фоден.
Манчестер Сити – Эдерсон, Стоунз, Лапорт, Уокер, Зинченко, Гюндоган, де Брюйне (Фернандиньо, 38), Бернарду Силва, Фоден (Сильва, 85), Стерлинг, Агуэро (Сане, 66).
Тоттенхэм – Гассанига, Дэвис, Вертонген, Алдервейрелд (Льоренте, 78), Фойт, Лукас Моура, Дайер (Ваньяма, 61), Эриксен, Алли (Роуз, 69), Санчес, Сон Хын Мин.
Огоҳлантиришлар: Ваньяма (86), Стерлинг (90), Вертонген (90).