Россиялик собиқ ҳимоячиси Владимир Пономарёв ЖЧ-2026 доирасида Португалиянинг Ўзбекистон устидан 5:0 ҳисобидаги йирик ғалабасини изоҳлади. Бу ҳақда Sports.kz Rusfootball.info манбасига таяниб хабар берди.

— Португалия жуда яхши ўйнади, лекин масала фақат шунда эмас — Ўзбекистон терма жамоаси жуда заиф. Биз тасаввур қилган даража эмас. У ерда Файзуллаев ҳам бор эди, хатолар қилди. Яхшики, у ҳозир ЦСКАда ўйнамаяпти.

Роналду эса бугун яхши ўйнади. Аввалги ўйинларда у Португалия сафида унчалик яхши кўринмаган эди, аммо бу сафар тўлиқ кучда ҳаракат қилди ва ўз ўйинини топди. Унинг атрофида ҳам кучли футболчилар бор — улар унга яхши паслар бермоқда. Унинг ўзи ҳам яхши узатмалар қилади. Роналду ўз даражасида ўйнади. Ва 41 ёшда бўлса ҳам жисмоний ҳолати ажойиб — ўзини жуда яхши сақлайди, — деди Пономарёв.

Эслатиб ўтамиз, гуруҳ босқичининг сўнгги турида Ўзбекистон терма жамоаси Конго ДРга қарши майдонга тушади. Учрашув 28 июнь куни бўлиб ўтади.