O‘zbekiston futbol assosiasiyasi tomonidan hududiy bolalar va o‘smirlar futbol akademiyalari faoliyatini to‘g‘ri yo‘lga qo‘yish, akademiya bitiruvchilarining kelajakda yetuk futbolchi bo‘lib yetishishlarini ta’minlash, milliy va yoshlar terma jamoalari uchun munosib nomzodlar tayyorlash maqsadida bir qator chora-tadbirlar amalga oshirilmoqda.
Jumladan, Toshkent shahar bolalar-o‘smirlar futbol akademiyasida “English For Football” o‘quv-dasturi bo‘yicha seminar o‘tkazildi. Seminarni akademiya direktori Iskandar Anarkulov ochib berdi. Shundan so‘ng ingliz tili bo‘yicha mutaxassis Muzaffar Sa’dullayev “English For Football” o‘quv-dasturi taqdimotini o‘tkazdi.
Taqdimot davomida ingliz tili bo‘lajak futbolchilar uchun xorijiy mamlakatlarda malaka oshirish va tajriba almashish uchun muloqot o‘rnatish, matbuot anjumanlarida qatnashish, xorij OAV xodimlariga intervyu berish jarayonlarida qay darajada muhim ekanligi tushuntirildi. Kunning ikkinchi qismida seminar ishtirokchilarga maxsus videolavha namoyish etildi.
Seminar so‘nggida akademiya tarbiyalanuvchilariga “English For Football” kitobi taqdim qilindi.
