Superliga 7-turi doirasidagi e’tiborli qarama-qarshilik Andijonda o‘tadi. Joriy mavsum debyutantlari sanalmish «Andijon» va «Dinamo» klublari Superliga doirasida ilk marta uchrashishadi. Oxirgi turda durang qayd etgan ikki jamoa ham ushbu bahsda faqat g‘alabani ko‘zlashi aniq.
Xususan, “Dinamo” jamoasi tur bezagiga aylangan Samarqandda “Navbahor”ga qarshi kechgan shiddatli o‘yinda 2:2 hisobidagi jangovar durang qayd etgan bo‘lsa, “Andijon” Termizda “Surxon” bilan 0:0 hisobga rozi bo‘ldi.
“Sog‘lom Avlod” stadionida o‘tadigan “Andijon” – “Dinamo” uchrashuvida anshlag kuzatilishi mumkin. Shu kuni Andijonga “Dinamo”ni qo‘llab-quvvatlash uchun Samarqanddan ham ko‘hna shaharlik ishqibozlar tashrifi kutilmoqda.
Superliga. 7-tur.
5 may (yakshanba)
“ANDIJON” – “DINAMO”
O‘yin boshlanish vaqti: 17:20
TV-translyasiya: «Sport» TV (jonli efir)
Joriy mavsumda…
Ushbu mavsumda Eldor Sakayev qo‘l ostidagi “Andijon” jamoasi 6 o‘yindan keyin 1 g‘alaba, 3 durang, 2 mag‘lubiyat bilan 6 ochko jamg‘arib, 10-pog‘onani band etib turgan bo‘lsa, Davron Fayziyev boshqaruvidagi “Dinamo” klubi 6 o‘yindan keyin 2 g‘alaba, 2 durang, 2 mag‘lubiyat bilan 8 ochko jamg‘argan holda 7-o‘rinni band etib turibdi. 7-turdagi g‘alaba ikki jamoadan birini turnir jadvalidagi holatini ancha yaxshilanishiga yordam beradi.
“Dinamo”ning o‘tkazgan o‘yinlari:
1-tur. “Dinamo” – “Nasaf” – 1:1
2-tur. “Surxon” – “Dinamo” – 1:0
3-tur. “Dinamo” – “Metallurg” – 2:1
4-tur. “Dinamo” – “So‘g‘diyona” – 1:0
5-tur. “Paxtakor” – “Dinamo” – 2:0
6-tur. “Dinamo” – “Navbahor” – 2:2
“Andijon”ning o‘tkazgan o‘yinlari:
1-tur. “Qizilqum” – “Andijon” – 1:1
2-tur. “Qo‘qon-1912” – “Andijon” – 0:0
3-tur. “Lokomotiv” – “Andijon” – 4:0
4-tur. “Bunyodkor” – “Andijon” – 1:0
5-tur. “Andijon” – “Nasaf” – 3:1
6-tur. “Surxon” – “Andijon” – 0:0
Tarkibda yo‘qotishlar bormi?
Tarkib borasida Eldor Sakayevda muammo yo‘q, Davron Fayziyev esa asosiy tarkib markaziy himoyachisi sanalmish Hakimxon A’lamxonov o‘rnini zaxiradan to‘ldirishi talab etiladi. Himoyachi “Navbahor”ga qarshi uchrashuvda chempionatdagi 4-sariq kartochkasini olib, bitta o‘yinlik diskvalifikasiyaga uchragan.
Andijonliklar safida Oybek Qilichev ehtiyot bo‘lib o‘ynashiga to‘g‘ri keladi. Ayni damda 3-sariq kartochkasi bo‘lgan Qilichev, “Dinamo”ga qarshi ham hakam tomonidan ogohlantirilsa, navbatdagi uchrashuvga diskvalifikasiyaga uchraydi.
Ayni damda andijonliklar tarkibida Ro‘zimboy Ahmedov 2 ta gol urib jamoa to‘purari bo‘lib turgan bo‘lsa, “Dinamo”da Qadamboy Nurmetovning hisobida ham shuncha gol bor.
Eski tanishlar…
Har ikki jamoa tarkibida ham bir qator futbolchilar borki, ular avval raqib jamoa safida to‘p surishgan. Xususan, “Andijon” tarkibidagi Ildar Mamatkazin (2014-15 yillar), Ro‘zimboy Ahmedov (2012-13), Sardor Sulaymonov (2017) kabi futbolchilar “Dinamo” sharafini himoya qilishgan.
“Dinamo” tarkibidagi Qadamboy Nurmetov, Siroj Hamroyev, Obid Hakimovlar esa avvalgi yillarda “Andijon” jamoasida faoliyat yuritishgan.
O‘zaro o‘yinlarda ustunlik kimda?
“Andijon” va “Dinamo” Oliy Liga tarixida 40 marta to‘qnash kelishgan. Ushbu o‘yinlardan 14 tasida andijonliklar g‘olib bo‘lishgan. 8 o‘yin durang hisobida yakunlangan. “Dinamo” shu kunga qadar Oliy Ligada “Andijon”ni 18 marta mag‘lubiyatga uchrata olgan.
“Dinamo” shu kungacha o‘zaro o‘yinlarda “Andijon” darvozasiga 62 ta gol kiritgan. “Andijon”ning gollari esa 51 ta. “Burgutlar” o‘zaro o‘yinlarda 50 ochko ishlab olishgan bo‘lsa, “Arslonlar” 62 ochkoni qo‘lga kirita olishgan. “Dinamo”ning Oliy Ligada “Andijon” ustidan erishgan eng yirik g‘alabasi 6:1ni tashkil qiladi. “Andijon”ning samarqandliklar ustidan qozongan eng yirik g‘alabasi esa – 4:1ga teng.
Andijonda o‘tgan o‘zaro so‘nggi uchrashuvlar:
Pro-Liga
05.10.2018 «Andijon» - «Dinamo» 1:0
18.05.2018 «Andijon» - «Dinamo» 3:1
2017 yil – «Andijon» quyi ligada.
2016 yil – «Dinamo» quyi ligada.
Oliy Liga
26.10.2015 «Andijon» - «Dinamo» 1:1
12.04.2014 «Andijon» - «Dinamo» 2:3
2013 yil – “Andijon” quyi ligada.
14.04.2012 «Andijon» - «Dinamo» 0:3
25.08.2011 «Andijon» - «Dinamo» 2:0
14.08.2010 «Andijon» - «Dinamo» 1:0
03.10.2009 «Andijon» - «Dinamo» 2:0
O‘zaro o‘yinlar haqida fakt…
“Dinamo” jamoasi so‘nggi marta bundan besh yil avval - 2014 yilda Andijondan g‘alaba bilan qaytgan. O‘shanda Abdulla Nabiyev va San’at Shixovning 85 va 90+3-daqiqadagi “dubli” “Dinamo”ning Andijondan g‘alaba bilan qaytishiga sabab bo‘lgandi. Ko‘ramiz, bu safar Samarqand klubi Andijondagi 5 yillik g‘alabasiz noxush an’anasiga barham bera olarmikan?
