Ma’lumki, Davlatimiz rahbari tomonidan yoshlar ma’naviyatini yuksaltirish maqsadida belgilangan 5 ta tashabbusning ikkinchisi yoshlarni jismoniy chiniqishi va sport sohasida o‘z qobiliyatini namoyon qilishlari uchun zarur sharoitlar yaratib berishdan iborat.
Mazkur tashabbusni keng miqyosda amalga oshirish uchun 2019 yil may oyi mamlakatimizda «Sport oyligi» deb e’lon qilindi. Shu munosabat bilan hamda 9 may «Xotira va qadrlash kuni»ga bag‘ishlab Jizzax viloyati Gimnastika sport turlariga ixtisoslashtirilgan bolalar-o‘smirlar sport maktabida Jismoniy tarbiya va sport boshqarmasi sovrini uchun «Badiiy gimnastika» bo‘yicha viloyat birinchiligi o‘tkazildi.
Musobaqada Jizzax ixtisoslashtirilgan olimpiya zaxiralari sport maktabi, shuningdek, Arnasoy, SH.Rashidov va Paxtakor tumanlaridan 2003 yilda tug‘ilgan hamda undan kichik yoshdagi 90 nafardan ziyod sport malikalari ishtirok etdilar.
Bahslar «Yakka tartib dasturi asosida» 4 tur, «Jamoaviy dastur asosida» 2 turda o‘tkazildi.
Yakuniy natijalarga ko‘ra, jamoaviy dastur bo‘yicha viloyat Gimnastikaga ixtisoslashtirilgan bolalar-o‘smirlar sport maktabi 1-o‘rinni,
Paxtakor tumani 2-o‘rinni, SH.Rashidov tumani jamoasi 3-o‘rinni egalladi.
G‘olib sportchi va jamoalar viloyat Jismoniy tarbiya va sport boshqarmasi tomonidan ta’sisi etilgan diplom va medallar bilan taqdirlandilar.
