Sport orqali O‘zbekiston shuhratini dunyoga tanitayotgan sportchilarimizdan biri Yanina Kuskovadir.   Yanina Sirdaryo viloyatidagi Guliston ixtisoslashtirilgan olimpiya zaxiralari maktab-internatida velosport yo‘nalishi bo‘yicha ta’lim olish bilan bir qatorda, sportchilik faoliyatida tinimsiz mehnati va g‘alabaga bo‘lgan intilishi sabab, ulkan marralarni zabt etmoqda.   Bu yil 18 yoshni qarshilagan YA.Kuskova bir necha bor mamlakat miqyosidagi sport musobaqalarida ishtirok etib, toblandi va bir qator medallarni qo‘lga kiritdi. U sportchilik faoliyatida ilk marotaba joriy yilning 8-13 yanvar kunlari Jakarta shahrida (Indoneziya) bo‘lib o‘tgan velosportning trek yo‘nalishi bo‘yicha Osiyo chempionatida ishtirok etdi. Sportchimiz musobaqaning o‘smirlar o‘rtasidagi yakkalik bahslarining vaqt poygasida bronza medalni, ochkolar bo‘yicha guruhli poygada kumush medalni qo‘lga kiritdi.   Shuningdek, Yanina o‘z mahoratini yanada oshirish maqsadida mart oyida Janubiy Koreyadagi o‘quv-yig‘in mashg‘ulotlarida malaka oshirib keldi. 22-28 aprel kunlari yurtimizda bo‘lib o‘tgan veloshosse bo‘yicha Osiyo chempionatida 20 yoshgacha bo‘lgan o‘smir qizlar o‘rtasidagi poygada kumush medalni qo‘lga kiritdi.   Uning erishayotgan ulkan yutuqlarini munosib taqdirlash, xalqaro musobaqalarda yuqori natijaga erishishi va bu orqali mamlakat sharafini dunyo uzra yuqoriga ko‘tarishi uchun Sirdaryo viloyati hokimi G‘ofurjon Mirzayev tomonidan Yanina Kuskova zamonaviy shosse velosipedi bilan taqdirlandi.   – Sportda erishayotgan yutuqlarimni, kamtarona mehnatlarimni yuqori baholab, barcha talablarga javob beradigan velosiped bilan taqdirlanganimdan baxtiyorman, – deydi YA.Kuskova. – Biz, sportchilar mamlakatimiz sharafini himoya qilish uchun bor kuch-g‘ayratimiz bilan harakat qilamiz. Maqsadim – Osiyo o‘yinlari, jahon va qit’a chempionatlari hamda Olimpiya o‘yinlarida g‘olib bo‘lib, yurtimiz dovrug‘ini jahonga taratish.    Ayni damda O‘zbekiston velosport federasiyasi va Xalqaro velosipedchilar ittifoqining (UCI) Butunjaxon velosportni rivojlantirish markazi bilan o‘rnatilgan ikki tomonlama xamkorlik doirasida federasiya YA.Kuskovani Shveysariyada o‘tadigan o‘quv-yig‘in mashg‘ulotlariga yuborishni rejalashtirgan.