Ektor Kuper boshchiligidagi O‘zbekiston milliy terma jamoasi navbatdagi xalqaro o‘rtoqlik o‘yinlariga hozirlik olib borayotganidan xabaringiz bor.
Milliy terma jamoa bugun Turkiyaga yo‘l olish oldidan poytaxtdagi oxirgi mashg‘ulotini o‘tkazdi. Bugungi mashg‘ulot ham "Jar" stadionida o‘tkazildi. Unda milliy chempionatimizda to‘p surayotgan futbolchilar bilan bir qatorda legionerlardan Odil Ahmedov, Eldor Shomurodov hamda Fozil Musayev ishtirok etdi.
Ta’kidlash joiz, ertaga terma jamoamiz vakillari o‘rtoqlik o‘yinida maydonga tushish uchun Turkiyaga yo‘l olishadi.
Turkiya – O‘zbekiston milliy terma jamoalari o‘rtasidagi o‘rtoqlik o‘yini 2 iyun kuni soat 23:00da Alanya shahridagi "Alanya Stadium" o‘yingohida bo‘lib o‘tadi.
