«Chelsi» YEL finalida «Arsenal»ga aslo imkoniyat bergani yo‘q - 4:1. «Aristokratlar» ja-moasi gollaridan biri ispaniyalik Pedro nomiga yozildi.

U o‘yindan so‘ng Eden Azar va butun jamoani maqtash barobarida shaxsiy ko‘rsatkichini ham tilga oldi: «Qarang, yevrokuboklar finalida yana gol urdim. Bunga aql bovar qilmaydi...».

Pedro shu goli bilan futbol tarixiga kirdi. U YEL va CHL (yoxud bu turnirlarning avvalgi talqini) finallarida gol urishga muvaffaq bo‘lgan 5-futbolchi bo‘ldi. Bunga qadar Ernan Krespo, Allan Simonsen, Dmitriy Alenichev va Stiven Jerrardga har ikki musobaqaning hal qiluvchi bahsida gol quvonchini tuyish nasib etgandi. Lekin Pedro ular orasida ham yaqqol ajralib turadi. Ispaniya terma jamoasi vakili shu bilan klub miqyosidagi xalqaro turnirlarning 5-finalida o‘z nomini tabloga yozdirib qo‘ydi. Umuman, uning hisobidagi bunday kuboklar soni 9taga yetdi.

Pedroning klublar miQyosidagi xalQaro turnirlar

 finallarida urgan gollari

1. Yevropa superkubogi-2009. «Barselona» - «Shaxtyor» - 1:0 (hal qiluvchi gol Pedro hisobiga yozildi)

2. Klublar o‘rtasidagi JCH-2009. «Barselona» - «Estudiantes» - 2:1 (Pedro 89-daqiqada hisobni tenglashtirdi)

3. CHL-2011. «Barselona» - «MYU» - 3:1 (Pedro hisobni ochdi)

4. Yevropa superkubogi-2015. «Barselona» - «Sevilya» - 5:4 (Pedro g‘alaba goliga mualliflik qildi)

5. YEL-2019. «Chelsi» - «Arsenal» - 4:1 (Pedro jamoasining 2-golini urdi)

Diqqatga sazovor tomoni, Pedro gol urgan finallarning 3tasida o‘yinga zaxiradan qo‘shilgan. Oxirgi finalda esa boshlang‘ich tarkibdan joy oldi, ammo 71-daqiqada o‘z o‘rnini zaxira vakiliga bo‘shatib berdi. 

Fakt. Pedro birgina Konfederasiyalar kubogini hisobga olmaganda, o‘zi qatnashishi mumkin bo‘lgan barcha xalqaro turnirlarda g‘alaba nash’asini surdi. Naq 6ta musobaqada - Jahon va Yevropa chempionati, CHL va YEL, Yevropa superkubogi va Klublar o‘rtasidagi JCH. Pedro bu borada yagona!