Jahon chempionati, Olimpiya o‘yinlari kabi yirik sport musobaqalarida atletlarimizning qo‘lga kiritadigan natijasi ularga yaratib beriladigan shart-sharoitlarga bog‘liq. Mustahkam va zamonaviy moddiy-texnik bazaga ega federasiya sportchilari xalqaro musobaqalarda hamisha yuqori natijalar ko‘rsatib kelishadi.

Bugun poytaxtimizdagi Respublika ixtisoslashtirilgan Olimpiya zahiralari maktab internatida (RIOZMI) sportchilarning yashashi, shug‘ullanishlari uchun yaratilgan sharoitlar mavzusiga bag‘ishlangan yig‘ilish bo‘lib o‘tdi.

Ushbu yig‘ilishni MOQ Bosh kotibi Jasur Matchanov va O‘zbekiston Milliy olimpiya qo‘mitasi prezidentining maslahatchisi Nazirjon Xudoyqulov olib borishdi. Yig‘ilishda dastavval har bir federasiyadagi sharoitlarni o‘rganishga biriktirilgan mas’ul vakillarning hisoboti tinglanib, oldinda qilinishi kerak bo‘lgan ishlar yuzasidan ko‘rsatmalar berildi.

“Barchangizga ma’lum, Tokio Olimpiadasiga ham oz fursat qoldi. Hali hech bir Olimpiadaning tayyorgarligiga hukumat tomonidan bunchalik katta e’tibor qaratilmagan. Biz ham shunga munosib ishlashimiz kerak. Sportchilarning shug‘ullanishlari uchun barcha sharoitlar yaratib berilmoqda. Shu bilan birga zamonaviy qulayliklarga ega bo‘lgan bazalarni, eng mustahkam va chidamli sport anjomlarini ko‘paytirishimiz lozim”, – dedi Nazirjon Xudoyqulov.

Shundan so‘ng mutasaddilar RIOZMIda kamondan otish bo‘yicha terma jamoa vakillari uchun qurilgan va boshqa sport turlari uchun qurilayotgan yangi ob’ektlarni ko‘zdan kechirishdi. Ayniqsa, suzuvchilar uchun qad rostlagan yangi turar joy ko‘pchilikning e’tiborini tortdi. Zamonaviy sharoitlarga ega bu bino bir vaqtning o‘zida 50 dan ortiq sportchini qabul qilishi mumkin. E’tiboringizga voqea joyidan olingan fotosuratlarni havola qilamiz.