Braziliya mezbonlik qilayotgan Amerika kubogida 1-tur o‘yinlari bo‘lib o‘tmoqda. "V" guruhidan o‘rin olgan Kolumbiya va Argentina terma jamoalari Salvador shahrida to‘qnash kelishdi.

Birinchi bo‘limda xavfli vaziyatlar deyarli yuzaga kelmadi va hisob ochilmadi. Ikkinchi taymda esa ustunlik ko‘proq Messi jamoadoshlari tomonida bo‘ldi. Bahsning 59 va 66-daqiqalarida "albisileste" burchak to‘pini o‘yinga kiritgan paytda golli vaziyat yuzaga keldi. Ammo kolumbiyaliklar posboni David Ospina mahorat ko‘rsatib, xavfni bartaraf etdi.

Kolumbiya esa yaratilgan imkoniyatlardan samarali foydalandi. Dastlab Xames Rodriges tomonidan yetkazilgan diagonal uzatmani qabul qilgan Roxer Martines bir himoyachini aldab, jarima maydonchasiga kirdi va 15 metrlardan kuchli zarba berib, darvozani ishg‘ol qildi.

O‘yin tugashiga 4 daqiqa qolganida kolumbiyaliklar Argentinani qarshi hujumda jazolashdi. Duvan Sapata to‘pni darvozaga joylab qo‘ydi.

Shu tariqa, Kolumbiya terma jamoasi 3 ochkoni qo‘lga kiritdi.

Amerika kubogi, "V" guruhi, 1-tur
Argentina – Kolumbiya 0:2 (0:0, 0:2)
Gollar: 0:1 – 71 Martines, 0:2 – 86 Sapata.
Argentina – Armani, Pesselya, Talyafiko, Saraviya, Otamendi, Lo Chelso, Paredes, Rodriges (Pisarro, 67), Di Mariya (de Paul, 46), Messi, Aguero (Suares, 79).
Kolumbiya – Ospina, Mina, Tesilyo, Medina, Sanches, Kuadrado (Lerma, 64), Barrios, Uribe, Xames, Muriel (Martines, 14), Falkao (Sapata, 81).
Ogohlantirishlar: Falkao (19), Rodriges (42), Saraviya (52), Paredes (55), Kuadrado (60), Sapata (87), Lerma (90).