Xabar berganimizdek, Toshkent 2022 yilning 7-13 mart kunlari figurali uchish bo‘yicha yoshlar o‘rtasidagi jahon chempionatini qabul qilish uchun da’vogar bo‘lib turibdi. Bugun Milliy Olimpiya qo‘mitasida JCH mezbonligiga bag‘ishlangan matbuot-anjumani bo‘lib o‘tdi. Unda MOQ mutasaddilari, O‘zbekiston qishki sport turlari assosiasiyasi rahbariyati va OAV vakillari ishtirok etishdi.

Ayni paytda Xalqaro konkichilar ittifoqiga mezbonlik bo‘yicha ariza topshirilgan. Anjumanda assosiasiya vakillari bo‘lajak jahon chempionatiga mezbonlik yurtimizda qishki sport turlarining rivoji uchun ne chog‘lik ahamiyatli ekani, xalqaro tashkilotning bu boradagi talablari xususida gapirib berishdi.

“Bu musobaqa haqiqatdan ham biz uchun katta ahamiyatga ega. Jahon chempionatini qabul qilib, yurtimizning nafaqat sport, balki turizm sohasidagi rivojiga xissa qo‘sha olamiz. Shubhasiz, bellashuvlarga “Humo arena” mezbonlik qilishi kutilmoqda. Musobaqa 4 yo‘nalishda: yigitlar va qizlar o‘rtasida yakkalik hamda juftlik, shuningdek, raqs bo‘yicha o‘tkaziladi. Jahon chempionatiga tayyorgarlik doirasida o‘smirlar o‘rtasidagi Gran-priga ham mezbonlik qilish niyatimiz bor. Bu bilan xalqaro tashkilotga jahon chempionatini yuqori saviyada o‘tkaza olishimizni ko‘rsatib beramiz. Qolaversa, musobaqa logotipini aniqlash uchun joriy yilning oktyabr va dekabr oylari orasida so‘rovnoma yoki konkurs o‘tkazishni rejalashtirganmiz”, – dedi O‘zbekiston qishki sport turlari assosiasiyasi vakili Artyom Knyazev.

Anjuman davomida sportchilarimizni ushbu jahon chempionatiga saralab olish va tayyorlash mavzusida ham fikr bildirildi. Shuningdek, assosiasiya vakillari jurnalistlarni qiziqtirgan savollarga javob berib o‘tishdi.