Kecha Andijondagi «Sog‘lom avlod» stadionida «Andijon» klubi «Buxoro»ni qabul qildi va 4:1 hisobida ishonchli g‘alabani qo‘lga kiritib, keyingi bosqichga yo‘llanmani qo‘lga kiritdi. O‘yindan keyin esa matbuot anjumani bo‘lib o‘tdi. Iatbuot anjumaning birinchi qismida mehmonlar bosh murabbiyi Muhsin Muhammadiyev ishtirok etdi.
- Bugungi mag‘lubiyat sababini qanday izohlaysiz?
- O‘yin haqida qanaqa fikr bildirishim mumkin? Bizning jamoa hali o‘yinga tayyor emas. Birinchi davra yakunlanishini kutamiz. Keyin shunga qarab tarkib va o‘yinimizda o‘zgartirishlar kiritishga harakat qilamiz. Bunday futbol o‘ynamaslik kerak. Biz albatta ikkinchi davraga munosib tayyorgarlik ko‘ramiz.
- Umuman olganda, «Buxoro»ning oldiga qanday vazifa qo‘yilgan?
- Bugungi kundagi bizning vazifamiz Superligada qolish. Nimagaki, jamoamizda kattaroq maqsadlarni bajarish uchun mahoratli o‘yinchilar yo‘q.
- Jamoa o‘yinini ko‘rganimizda ichki muhit ham yaxshi emasligi ko‘rinib turibdi…
- Men ham tushunmay qolyapman. Jamoada qanday muhit bor? Bu savolga javob bera olmayapman. «Buxoro»ga yaqindagina keldim va hali bu jamoa bilan ko‘p vaqt o‘tkazganaim yo‘q. Shu bois mening o‘zimda ham bu jamoaga nisbatan savollarim ko‘p.
