Xalqaro «Olimpiya kuni» katta shodiyona bilan nishonlangach, Lozannada XOQning 134-sessiyasi ish boshladi. Unda kun tartiba qo‘yilgan eng asosiy masala 7 yildan so‘ng bo‘lib o‘tadigan qishki Olimpiya o‘yinlariga mezbon shahar nomini aniqlash bo‘ldi.
2026 yili o‘tkaziladigan Olimpiadaga nomzod shaharlar orasida Italiyaning Milan va Kortina d’Ampesso (birgalikda) hamda Shvesiyaning Stokgolm shaharlari so‘nggi bosqichigacha yetib kelishdi. Yakuniy ovoz berish natijalariga ko‘ra, XXV qishki Olimpiya o‘yinlariga Milan va Kortina d’Ampesso shaharlari mezbon, deb topildi. Ushbu musobaqa 2026 yilning 6-22 fevral kunlari o‘tkaziladi.
Ma’lumot uchun, Kortina d’Ampesso shahrining o‘zi 1956 yili VII qishki Olimpiadaga mezbon bo‘lgan. Italiyaning boshqa bir shahri Turin 2006 yilgi qishki Olimpiya o‘yinlarini qabul qilgan edi. Eslatib o‘tamiz, 2022 yilgi qishki Olimpiada Xitoyning Pekin shahrida o‘tkaziladi.














