O‘zbekiston taekvondo WTF assosiasiyasining majlislar zalida tashkilotning ishini rivojlantirish va undagi kamchiliklarni bartaraf etish mavzusida tezkor yig‘ilish o‘tkazildi. Unda assosiasiyaning hududiy bo‘limlari rahbarlari, bosh murabbiy, bosh hakam va ma’muriy-boshqaruv xodimlari ishtirok etishdi. Yig‘ilishda assosiasiya raisi xududiy bo‘lim rahbarlari bilan tanishib, ularning talab va takliflarini tingladi. Albatta, bugungi kunda bo‘limlarda ish darajasi qoniqarli, deb bo‘lmaydi. Tezkorlik bilan yangri reja asosida ish olib borish kerakligi, mavjud kamchiliklarni bartaraf etib, murabbiylar faoliyatini yaxshilash, yo‘l qo‘yilgan xatolar ustida ishlab, ularni to‘liq o‘rganib chiqish kerakligi ta’kidlab o‘tildi.
Sportchilarning belbog‘lar tasnifi uchun yig‘iladigan badal pullarini qonuniy tarzda hududiy federasiyalar ixtiyorida qoldirish, viloyatlarda yetishmayotgan jihozlarni aniqlab chiqish, Olimpiya o‘yinlari vazn toifasi bo‘yicha saralovchi turnir ish rejasini tayyorlash, viloyatlardagi iqtidorli sportchilar ro‘yxatini tuzish, shuningdek, xalqaro hakamlik toifalariga ega referilar sonini oshirish va ularning xalqaro seminarlardagi ishtiroklarini ta’minlash eng dolzarb masalalardan ekanligi qayd etildi. Ushbu yig‘ilishda belgilangan barcha ishlar yuzasidan to‘liq nazorat assosiasiya rahbari zimmasida qoldirildi.
