Yurtimiz bo‘ylab o‘tkazilayotgan “Olimpiya kuni” poytaxtimizda ham katta tantana bilan nishonlanmoqda. Bugungi tadbirlarning dastlabkisi erta tongdanoq boshlanib ketdi. “Xalqlar do‘stligi” maydonida yig‘ilgan minglab kishilar Milliy olimpiya qo‘mitasi binosi tomon ommaviy yurish tashkil qilishdi. Mazkur tadbir Toshkent shahar hokimligi, jismoniy tarbiya va sport boshqarmasi bilan hamkorlikda tashkil etilib, unda 10 mingga yaqin odam qatnashdi.
Shundan so‘ng barchaning diqqat-e’tibori yengil atletika federasiyasi oldida o‘tkazilgan yugurish bahslariga qaratildi. Bellashuvlar startidan avval tantanali ochilish marosimi o‘tkazildi. Unda MOQ prezidenti Rustam Shoabdurahmonov, yengil atletika federasiyasi rahbari Andrey Abduvaliyev, sport faxriylari kengashi raisi Komiljon Xudoyberganov ishtirok etib, “Olimpiya kuni”ning mohiyati, bayram taassurotlari haqida gapirishdi va barchani ommaviy sport bilan keng shug‘ullanishga chorlab qolishdi.
Reglamentga ko‘ra, yugurish bahslari turli yosh toifalari bo‘yicha o‘tkazildi. Unda 13 yoshdan 79 yoshgacha bo‘lgan sportsevarlar turli masofalarga yugurish bo‘yicha bahs olib borishdi. Yakunda g‘olib va sovrindorlar tashkilotchilarning qimmatbaho esdalik sovg‘alari bilan taqdirlandilar.
