Avvalgi o‘yindan farqli ravishda Vadim Abramov uchrashuv kuni futbolchilarni «trenajer zali»da shug‘ullantirgani yo‘q. Balki shuning uchun bo‘lsa kerak, yigitlar Belorus chempionati oliy ligasida 7-o‘rinni egallab turgan, so‘nggi uch o‘yinda 7 ochko jamg‘argan «Gorodeya»dan to‘pni nazorat qilish borasida katta ustunlikka ega bo‘lgandir?!
«Gorodeya» shu kuni o‘z muxlislari ko‘z o‘ngida mag‘lubiyatga uchramaslik uchun bor imkoniyatini ishga soldi. Ammo o‘yinni tashkil qilish va to‘pni nazoratida sezilarli darajada ustunlikka ega futbolchilarimiz mezbonlar darvozasini har bir bo‘limda bir martadan ishg‘ol qilib, amalda o‘yin taqdirini hal qilishdi. Qolaversa, hakam hisob qisqarganidan keyin Farrux Ikromovga nisbatan ishlatilgan penaltiga tortadigan qo‘pollikka ko‘z yumdi. Bu xato uchrashuv yakunida jamoamizga qimmatga tushishi mumkin edi, lekin omadimiz keldi. Katta tezlikda qarshi hujumga o‘tgan mezbonlarning so‘nggi zarbasi darvoza to‘siniga tegdi. Sanoqli santimetrlar «Bunyodkor»ning g‘alabasiga to‘sqinlik qila olmadi.
O‘RTOQLIK UCHRASHUVI
«GORODEYA» (Belorus) – «BUNYODKOR» - 1:2 (0:1)
«Bunyodkor»: Murodjon Zuhurov (Abdumavlon Abdujalilov, 46), Anvar G‘ofurov (Valeriy Akopov, 71), Ulug‘bek Abdullayev, Abdulla Abdullayev, Sanjar Qodirqulov, Dilshod Ahmadaliyev (Muhammadodil Qahramonov, 59), Javohir Qahramonov (Boburbek Farhodov, 54), Nurillo To‘xtasinov (Sanjar Rixsiboyev, 81), Xurshid G‘iyosov (Jasurbek Jaloliddinov, 61), Lutfulla To‘rayev (Farrux Ikromov, 67), Mirjahon Mirahmadov (Muhammad Diallo, 46; Vladislav Nuriyev, 79).
Gollar: Maksim Rovbut, 34-o‘z darvozasiga – 0:1. Muhammad Diallo, 58 – 0:2. Dmitriy Bayduk, 72 – 1:2.
