«Atletiko» klubi «Barselona»ga transfer qilingan Antuan Grizmann masalasida Ispaniya qirollik futbol federasiyasi va La ligaga murojaat qildi.

Kataloniyaliklar futbolchi uchun shartnomada ko‘rsatilgan 120 million yevro miqdoridagi tovon pulini to‘ladi va Antuan 12 iyul kuni "Barsa" futbolchisiga aylandi. "Matraschilar" yana 80 million yevro miqdorida pul undirishni ko‘zlashmoqda. Ularning fikricha, «Barselona» Grizmann bilan mart oyida kelishib olgan. O‘sha paytda esa o‘yinchining tovon puli 200 million yevroga teng edi. 1 iyuldan boshlab esa tovon puli 120 million yevroga aylandi.

«Atletiko» preziyenti Enrike Seresoning ta’kidlashicha, «Barselona» tomonidan yo‘l qo‘yilgan qoidabuzarlik borasida unda isbotlar bor. Shu bois, jamoa qo‘shimcha 80 million yevroni qo‘lga kiritmoqchi.

Bundan tashqari, «Atletiko» bu ish yuzasidan FIFAga murojaat qilmoqchi edi. Ammo tashkilot klublar o‘rtasidagi muammoni hal qilish FIFAning vakolatiga kirmasligini ta’kidlagan.