Poytaxtimizda karate bo‘yicha Osiyo chempionati o‘z yakuniga yetdi. 3 kun davom etgan musobaqada qit’amizning eng mohir karate ustalari o‘z mahoratlarini namoyish etishdi.
Reglamentga ko‘ra, musobaqaning so‘nggi kunida jamoaviy kumite bahslari o‘tkazildi. Unda qatnashgan O‘zbekiston terma jamoasi yakunda bronza medalini qo‘lga kiritdi. Karatechilarimiz dastlab Janubiy Koreya, Quvayt termalarini mag‘lub etishdi. Yarim finalda esa Saudiya Arabistoni vakillariga imkoniyatni boy berib qo‘ydik. Bronza medali uchun kechgan jangda iordaniyalik karate ustalari 3:2 hisobida dog‘da qoldirildi.
Shu tariqa terma jamoamiz mazkur Osiyo chempionatini 7 ta medal bilan yakunladi. Eslatib o‘tamiz, yakkalik bellashuvlarida hamyurtlarimiz 3 ta oltin, 1 ta kumush va 2 ta bronza medallariga egalik qilishgan edi.
