12-20 iyul kunlari Qozog‘istonning Nur-Sultan shahrida para-pauerlifting bo‘yicha navbatdagi jahon chempionati o‘tkazildi.

100 ga yaqin mamlakat vakillari orasida O‘zbekiston terma jamoasi ham ushbu dunyo birinchiligida munosib qatnashib, 3 ta kumush medalni qo‘lga kiritdi. Kecha tunda musobaqada ishtirok etgan delegasiyamiz poytaxtimizga qaytib keldi. Islom Karimov nomidagi Toshkent xalqaro aeroportida bo‘lib o‘tgan kutib olish marosimida O‘zbekiston Paralimpiya assosiasiyasi, sport jamoatchiligi va para-atletlarimizning yaqinlari ishtirok etishdi.

Ushbu musobaqada kumush medalni qo‘lga kiritgan Ro‘za Qo‘ziyeva (-61 kg), Azizbek Turg‘unov (-59 kg) hamda Sultonboy Matyakubov (-72 kg) Tokio Paralimpiadasi uchun qimmatli reyting ochkolarini jamg‘ardilar. Ta’kidlash joiz, ular ushbu muvaffaqiyatdan keyin jahon reytingining kuchli o‘ntaligida turli pog‘onalarni egallab turishibdi. Para-atletlarimiz reyting ochkolarini jamg‘arish mavsumi yakunlangungacha ushbu o‘rinlarini saqlab qola olsalar, Tokio Paralimpiadasining yo‘llanmasini qo‘lga kiritishadi.