Bugun O‘zbekiston Milliy olimpiya qo‘mitasida O‘zbekiston bodibilding, fitnes va mas-restling federasiyasining navbatdan tashqari hisobot-saylov konferensiyasi bo‘lib o‘tdi. Unda Milliy Olimpiya qo‘mitasi prezidenti Rustam Shoabdurahmonov, Jismoniy tarbiya va sport vazirining birinchi o‘rinbosari Oybek Kasimov, O‘zbekiston bodibilding, fitnes va mas-restling federasiyasi mutasaddilari, shuningdek, sport jamoatchiligi va OAV xodimlari ishtirok etishdi. Konferensiyada tashkilotga yangi rahbar va vise-prezident saylash kun tartibiga qo‘yilgan eng asosiy masala edi.

Yig‘ilishda dastlab, shu paytgacha federasiya rahbari sifatida faoliyat olib borgan Dmitriy Adismanning vise-prezidentlikka o‘tishi haqidagi arizasi ko‘rib chiqildi. Shundan so‘ng federasiya raisligiga O‘zbekiston Respublikasi Prezidentining yoshlar, fan, ta’lim, sog‘liqni saqlash va sport masalalari bo‘yicha maslahatchisi o‘rinbosari Odil Qalandarovich Abdurahmonov nomzodi ovoz berishga qo‘yildi. Nomzod Konferensiya ishtirokchilari tomonidan bir ovozdan ma’qullandi va Odil Abdurahmonov O‘zbekiston bodibilding, fitnes va mas-restling federasiyasining raisi etib saylandi.

Federasiyaning sobiq rahbari Dmitriy Adisman esa unga o‘rinbosar sifatida yordam beradigan bo‘ldi.

Yig‘ilish doirasida so‘zga chiqqan Rustam Shoabdurahmonov va Oybek Kasimov yangi rahbarning faoliyatida omad tilab o‘tishdi. Shuningdek, yangi rahbar o‘z ishiga kirishar ekan, faoliyati davomida ushbu sportni yangi bosqichga olib chiqish va uni yoshlar orasida yanada ommalashtirishga astoydil harakat qilishini ta’kidlab o‘tdi.