Iordaniyaning Amman shahrida taekvondo bo‘yicha G1 toifasiga kiruvchi xalqaro musobaqa bo‘lib o‘tdi. Mazkur musobaqada Tokio Olimpiadasiga reyting ochkolari o‘ynalgani uchun ham turnir keskin va murosasiz raqobatga boy bo‘ldi.

E’tiborlisi, ushbu musobaqada ishtirok etgan 4 nafar taekvondochimizning barchasi sovrinli o‘rinlarni qo‘lga kiritdi. Qizlarimiz Nigora Tursunqulova (-67 kg) hamda Svetlana Osipova (+73 kg) o‘z vazn toifalarida finalgacha yetib borib, yakunda kumush medal bilan taqdirlanishdi. Shohruh Rajabov (+87 kg) va Nikita Rafalovich (-80 kg) esa bronza medaliga sazovor bo‘ldilar. Shuningdek, barcha vakillarimiz Tokio Olimpiadasi uchun qimmatli reyting ochkolarini ham o‘z hisoblariga qo‘shib qo‘yishdi.