Butunjahon boks assosiasiyasi WBA professional bokschilarning iyul oyi uchun reytingini e’lon qildi. Bu haqda GoSport.uz internet-nashri muxbiri xabar bermoqda.
Unda o‘zbekistonlik ikki bokschi Shahram G‘iyosov (8-0, 6 KO) va Shohjahon Ergashev (16-0, 14 KO) yuqorilashga muvaffaq bo‘ldi.
Super yengil (-63,5 kg) vazn toifasida ringga chiqayotgan Shahram G‘iyosov ham, Shohjahon Ergashev ham yangi chiqarilgan reytingda oldingi oyga nisbatan bir pog‘ona yuqoriladi. Shohjahon reytingida to‘rtinchi o‘rinda qayd etilgan bo‘lsa, Shahram G‘iyosov 10-o‘ringa joylashdi.
Ikki sportchining reytingdagi yuqorilashi ularning o‘zlariga bog‘liq bo‘lmagan holda ro‘y berdib. Misol uchun reytingda to‘rtinchi borgan Jonatan Alonso (18-1, 7 KO) vaqtinchalik jahon chempionlik kamari uchun jangda Imkoniyatni boy bergach, o‘z-o‘zidan pastladi va Shohjahon Ergashev may oyidagi o‘rniga qaytdi. Shahram G‘iyosov esa Vergil Ortis (13-0, 13 KO) faoliyatini yarim o‘rta (66,68 kg) vaznda davom ettirishi sabab bu vazn reytingidan chiqib ketdi va natijada G‘iyosov 10-o‘ringa ko‘tarildi.
Yangilangan reytingda super yarim o‘rta (-69,85 kg) vazn toifasida ringga chiqayotgan Isroil Madrimov (3-0, 3 KO) iyun oyidagi o‘rnidan ikki pog‘ona pastlab 8-o‘rindan joy oldi.
Ikkinchi yarim yengil (-55,34 kg) vazn toifasida ringga chiqayotgan Murodjon Ahmadaliyev (6-0, 5 KO) o‘tgan oydagi kabi ikkinchi o‘rinda qoldi.
Reytingda o‘zbekistonlik boshqa sportchilar o‘rin olmagan.
