Yevropa futbolida yangi mavsum boshlanishiga oz fursat qoldi. Futbol TV telekanali yangi mavsumda ham muxlislar uchun Top-5 chempionatiga kiruvchi Angliya Premyer ligasi, La liga, Italiya A seriyasi, shuningdek, Evropa chempionlar ligasi, Yevropa ligasi musobaqalaridan o‘rin olgan uchrashuvlarni jonli efirda namoyish qilib boradi.
Shu jumladan, mamlakat chempioni va Kubok egasi o‘rtasida kechadigan, Yevropa chempionlar ligasi va Yevropa ligasi g‘olibi o‘zaro bahs olib boradigan Superkubok uchrashuvlari ham to‘g‘ridan-to‘g‘ri efirga uzatiladi.
Bundan tashqari telekanalimiz muxlislarini yangi mavsumda bir qator yangi syurprizlar kutmoqda. Telekanal ijodkorlari futbol ishqibozlari uchun bir-biridan qiziqarli yangi loyihalar va ko‘rsatuvlar tayyorlab qo‘yishgan.
Jumladan, 4 avgust kuni “Uembli” stadionida Angliya Superkubogi uchun “Manchester Siti” va “Liverpul” jamoalari o‘zaro bahs olib borishadi. Bu o‘yinni muxlislar Futbol TV telekanalida jonli efirda tomosha qilishdan tashqari, shu kuni poytaxtimizdagi “Chelsi Pab”da tasvirga olinadigan va efirga uzatiladigan yangi loyiha — “Fan Time” ko‘rsatuvida ham ishtirok etishlari mumkin.
“Fan Time” — nomidan ham bilib olganingizdek, mashhur jamoalar muxlislari haqida hikoya qiluvchi ko‘rsatuv bo‘lib, ko‘rsatuvda Yevropa grandlarining O‘zbekistondagi fan-klublari, muxlislar guruhlari faoliyati, ularning o‘zaro yig‘ilib, sevimli jamoalari muxlislik qilishlari, muxlislik madaniyatini shakllantirish, o‘z jamoasiga sodiqlik, g‘alaba va mag‘lubiyat paytida jamoa bilan birga bo‘lish mavzusidagi lavhalar jonli efirda (LIVE) berib boriladi.
Ko‘rsatuvni taniqli boshlovchilar Dilshodbek Kattabekov va Nilufar Sotiboldiyevalar olib borishadi. 4 avgust kuni “Chelsi Pab”da tasvirga olinadigan ko‘rsatuvning ilk sonida taniqli rossiyalik sharhlovchi Aleksandr Yelagin va repper Shahriyor mehmon bo‘lishadi.
Bundan tashqari, yangi mavsumdan boshlab taniqli boshlovchi Ibrohim Ahmedov muallifligida “Offside” ko‘rsatuvi muxlislar hukmiga havola qilinadi. Mazkur ko‘rsatuvda taniqli insonlar, mashhur shaxslar bilan futbol olamida va futboldan tashqarida ro‘y berayotgan voqea-hodisalar haqida qiziqarli suhbatlar uyushtiriladi. Shuningdek, ko‘rsatuv mehmonlari bilan turli qiziqarli o‘yinlar tashkil etiladi.
O‘tgan mavsumda muxlislar e’tiborini qozongan “Fantastik to‘rtlik” va “Futbol raqamlarda” ko‘rsatuvlari ham yangi mavsumda muxlislarga o‘tmish va zamonamizning mashhur futbol yulduzlari haqidagi syujetlar, qiziqarli faktlar, olamshumul rekordlar haqida ma’lumot berishda davom etadi.
Shuningdek, APL, La Liga, Italiya A seriyasi, YECHL va Yevropa ligasidan o‘rin olgan uchrashuvlarning eng qiziqarli vaziyatlari, kiritilgan gollari aks etgan HIGHLIGHTS, «APL World», REVIEW, MAGAZINE kabi dasturlar muntazam ravishda efirga uzatib boriladi.
“Football News” dasturi orqali esa muxlislar futbol olamida ro‘y beryotgan eng so‘nggi yangiliklardan xabardor bo‘lib borishlari mumkin.
Futbol TV telekanalida syurprizlar mavsumi davom etadi!
