Rossiyaning «Rostov» klubi va O‘zbekiston terma jamoasi hujumchisi Eldor Shomurodov faoliyatini boshqa jamoada davom ettirishi mumkin. Bu haqda Gosport.uz internet-nashri manbalari xabar bermoqda.
Ma’lumotlarga ko‘ra, futbolchiga Moskvaning SSKA klubi jiddiy qiziqish bildirmoqda. Moskvaliklar asosiy hujumchisi Fyodor Chalovga Angliyadan qiziqish bo‘layotgani sababli futbolchi jamoadan ketishi kutilmoqda. Shu boisdan ham klub boshqa hujumchi izlash harakatiga tushib qolgan va bu borada eng asosiy nomzod sifatida Eldor Shomurodov nomi tilga olinmoqda.
Ammo «Rostov» O‘zbekistonlik futbolchini sotish niyatida emas . O‘z navbatida Shomurodovning agentlari ham faqatgina kuchli beshlikdan tushadigan takliflarni ko‘rib chiqishlari mumkinligini ma’lum qilgan.
Ma’lumot uchun, Shomurodov joriy mavsumda «Rostov» tarkibida 4 o‘yinda maydonga tushib 5ta golda (3ta gol, 2ta golli pas) ishtirok etishga ulgurdi.
