Portugaliya terma jamoasi hujumchisi Krishtianu Ronaldu Yevro-2020 saralash bosqichi doirasida Litvaga qarshi o‘yin (5:1) borasida o‘z fikrlarini bildirib o‘tdi. Eslatib o‘tamiz, futbolchi mazkur o‘yinda "poker"ga erishdi.

«Vaqtimni yaxshi o‘tkazyapman. Terma jamoada ham barchasi yaxshi. Gollar urayotganim uchun emas, so‘nggi yillarda biz namoyish qilayotgan o‘yin saviyasidan zavqlanyapman. Men terma jamoaga yordam berishda davom etishim kerak.

Eng qiyini, Serbiyaga qarshi o‘yinda g‘alaba qozonish bo‘ldi. Bugun esa g‘alabali seriyani davom ettirishimiz kerak edi. Biz Yevropa chempionati yo‘llanmasini qo‘lga kiritishga yaqinmiz.

Oldimizda ikkita o‘yin kutib turibdi — bittasi uyda, bittasi safarda. Ulardan bittasida g‘alaba qozonsak, yetarli bo‘ladi», – dedi Ronaldu.