Bilasiz, fikrlarimni bildirish uchun menda turli maydonlar bor: radio, TV, ijtimoiy tarmoqlar. Hammasida ham ko‘pincha keskin fikrlar bildirib yuborishim bor gap. Ehtimol, bu mening kamchiligim. Yanayam bilmadim.
Yaqinda Milliy jamoamizning rasvo to‘pteparlari haqidagi fikrlarim qanchalar rezonans keltirib chiqardi, hatto yelkadoshim Jamoliddin Bobojonov menga jonli efirda "gaplaringizni isbotlab bering", deb salkam dag‘dag‘a qildi. Ayrimlar uchun o‘sha to‘pteparlar bunaqa fasod ishlarda qatnashmaydigan farishtalardir, biroq futbolchilarning ko‘pi ichki chempionatdagi kelishilgan o‘yinlarda ishtirok etishganini inobatga olsak, men ularning mana shunday ishlarni qila olishiga ishonaman. Siz esa ishonasizmi, yo‘qmi, o‘zingiz bilasiz.
Yana keskinlashaman, aytib qo‘yay.
Mo‘minjonov ishi yodingizdami? Undan keyin Proliga jamoasidagi bir qancha shaxslar qing‘irliklarda ayblangani-chi? Etika qo‘mitasi degan qo‘mita bor edi, o‘sha qo‘mita ana shu chirkinliklarni ochib tashladi. Endi u qo‘mita yo‘q. Avvalgi rahbariyat bilan birga yo‘q bo‘ldi. Chirkinliklar tugadi deysizmi?
Biz biron gap gapirsak, isbot talab qilishadi. Mirsodiqov, Mo‘minjonov va boshqa kamyob isbotlangan ishlar isbot emasmi, fakt emasmi? Futbolimiz shaffof va tozami? Nega unda birinchi davrani yaxshi o‘tkazgan Dinamo ketma-ket 8 o‘yinda yutqazadi? Nega Ro‘ziqul Berdiyev jamoasi Andijondagi spektaklda, keyinroq esa o‘z uyida oxirgi o‘rinda borayotgan Buxoroga mag‘lub bo‘ladi-yu, peshqadamlar bilan jonini jabborga berib o‘ynaydi? Bechora muxlis anqov - jamoasi autsayderga mag‘lub bo‘lganini zumda unutvoradi, sababi uning sevimli jamoasi grand jamoaga qarshi zo‘r o‘ynab bergan. Bu chalg‘itish usuli deyiladi. Biror mard yo‘qki, Ashurmatov, Berdiyev, Fayziyev va yana boshqa kouchlarning giribonidan olib, mana bunday tikka savol bersa: nega jamoamiz avvaliga yaxshi o‘ynab turadi, ochkolar yig‘ib olib, ligadan tushib ketmasligiga ko‘zi yetgandan so‘ng mag‘lub bo‘la boshlaydi?
Totalizator o‘ynashadimi, hakamlarni sotvolishadimi, narigi jamoaga pul berib/olishadimi, hokimlarning iltimosini bajarishadimi, farqi yo‘q - bularning bari jirkanch. Bunaqa ishlarni aniqlash esa jurnalistning emas, boshqa idoraning ishi. Biz odatda ko‘zga ko‘rinib turgan, yaqqol namoyon bo‘lib turgan g‘alati o‘yinlardan xulosalar chiqaramiz. Ahmoq emasmiz axir!
Fakt deysizmi? Faktim yo‘q. Tuhmat ham qilmayapman. Mo‘minjonov misolida futbolimizga ko‘zgu tutyapman. Aslida o‘sha ish ham oxiriga yetkazilmagan - o‘yinni sotgan Mo‘minjonov jazolanadi-yu, ikkinchi tomon, ya’ni Lokomotivga hech chora ko‘rilmas emish. Pfff!
Har bir muxlis jamoasi rahbariyati va murabbiyidan so‘rab oladigan, talab qila oladigan darajaga yetishi kerak. Sharhlovchi, jurnalist yoki boshqa birov aybdor emas jamoangizning abgor ahvolida. Alamingizni boshqalardan olmang. Jamoangiz boshqaruvidagilardan so‘rab oling. Ishoning, chirib yotibdi hammasi!
Shundan keyin ham stadionga borasizmi? Tirikchiligingizdan qolmang. O‘shanisi foydali!
