APL ajoyib turnir. Shunisi ajoyibki, istalgan jamoa boshqa bir istalgan klubni mag‘lub eta oladi. Shunisi ajoyibki, quyi ligadan chiqqan jamoalar yetakchilarni mag‘lub etishi mumkin, bu hech kimni ajablantirmaydi ham. Eng muhimi, quyi ligadan chiqqan klub APLda chempion ham bo‘lishi mumkin. Boshqa ligalarda esa bunday holatni deyarli ko‘rmaysiz. Angliyada esa mazkur natijani “Lester” qayd etdi.
TASODIF EMAS
Italiyalik mutaxassis Klaudio Ranyeri hamda uning “tulkilar”i APLda chinakam to‘ntarish amalga oshirgani yodingizda bo‘lsa kerak. Bu kutilmagan yoki tasodifiy natija dersiz. To‘g‘ri. Ammo buning boshqa sabablari ham bor. Masalan, Ranyerining “Lester”ida futbolga chanqoq yigitlar yig‘ilgandi. Maqsadi futboldan pul topish emas, futboldan zavq olish bo‘lgan yigitlar yig‘ilgandi. Mahrezga o‘xshagan qayerga kelib qolganini tuzuk anglamagan, ammo maza qilib futbol o‘ynashi kerakligini bilgan yigitlar yig‘ilgandi. Ranyeri esa ana shu qoni qaynoq yigitlarga munosib ustoz bo‘la oldi. Oqibatda o‘sha fantastik mavsumda yangi yil arafasida APL turnir jadvalida birinchi o‘ringa chiqqan “Lester” shu bilan pastga tushmadi. Buni qarangki, muddatidan oldin chempion bo‘lishni ham uddaladi.
“Lester”da pul yo‘q edi, “Lester”da tarkibni kuchaytirib yuborar darajada mablag‘ ham yo‘q edi. Shu bois ham keyingi mavsumda “tulkilar” chempionlikni saqlab qola olishmadi. Buni ko‘pchilik kutmagandi ham. Ammo...
HOZIR HAM KUCHLILAR SAFIDA
Hozir “Liverpul” hamda “Lester” o‘rtasidagi o‘yinga bemalol “markaziy o‘yin” maqomini bersam bo‘ladi. Ya’ni “Lester” hozir ham kuchlilar qatorida. Turnirni kuchli oltilikda yakunlashga da’vogarlar safiga ham kiritish mumkin. Bu hozirda “Lester”ning doimiy darajasidir, aniqroq aytadigan bo‘lsak, taxtdan ayrilgan bo‘lsa-da, “kuchli jamoa” maqomini yo‘qotmadi “Lester”.
“Lester” Angliya va Yevropa futboliga ko‘p narsa berdi. Jeymi Vardi Angliya terma jamoasida o‘ynagan va hozir ham bu ishni qoyillatadigan futbolchi, Riyad Mahrez ayni damda APLning eng yaxshi yarim himoyachilaridan biri, Kasper Shmeyxel — bir paytlar dunyo futbolining temir posbonlaridan biri bo‘lgan afsonaviy Petr Shmeyxelning o‘g‘li — hozirda APLning kuchli posbonlaridan biri. Ngolo Kante — “Chelsi”ning yuragiga aylangan, Fransiya terma jamoasining ham ajralmas qismi bo‘lgan futbolchi... Xullas, bunday nomlarni istagancha sanash mumkin. Ular “Lester”da kashf etilgan futbolchilar. Agar bu yulduzlar “Lester”da qolishganida, ehtimol, “tulkilar” yana bir bor chempion bo‘lishlari mumkin edi. Ammo boshqa tomondan bu jamoa ko‘plab iqtidorlar uchun mashhurlik sari eltuvchi ko‘prik vazifasini bajardi.
IQTIDORLAR HAMON BOR
“Lester”da iqtidorlar hozir ham bor. Ayni damda Brendan Rodjers qo‘l ostida bir qator bo‘lajak yulduzlar to‘p surayotgan bo‘lsa, ne ajab. “Lester” hali ko‘p narsaga qodir. Joriy mavsumda ham jamoa sovrinli o‘rinlar uchun kurashsa, ajab emas. Qolaversa, Brendan Rodjers har doim ana shunday shijoatli jamoalarni boshqarishga o‘rgangan. Umid qilamizki, Rodjers ham “Lester” tarixida Ranyeridek iz qoldiradi. Rodjers ham “Lester”ning yangi kashfiyotlarini kashf qiladi. Biz esa “tulkilar”ning kam sonli ashaddiy muxlislari uchun jamoaning yuksak natijalarga erishishini tilab qolamiz.
