17-18 oktyabr Qatarning Doxa shahrida Milliy olimpiya qo‘mitalari Assosiasiyasining (MOQA) XXIV Bosh Assambleyasi bo‘lib o‘tdi. Mazkur tadbirda Xalqaro Olimpiya qo‘mitasiga a’zo 204 mamlakat vakillari qatorida O‘zbekiston Milliy olimpiya qo‘mitasi prezidenti Rustam Shoabdurahmonov, shuningdek, MOQ prezidenti maslahatchisi Sherzod Asatullayev ham qatnashdi.
Assambleyaning birinchi kunida MOQA rahbariyati va qit’alar kesimida tashkilotning ortda qolgan vaqt oralig‘ida qilgan ishlari yuzasidan hisobotlari tinglandi. Kecha 2022 yil Pekinda bo‘lib o‘tadigan qishki Olimpiya o‘yinlari va Senegaldagi o‘smirlar Olimpiadasi, 2024 yili Parijda o‘tadigan XXXIII yozgi Olimpiya o‘yinlari, 2026 yil Milan/Kortina shaharlari mezbonlik qiladigan qishki Olimpiya o‘yinlariga ko‘rilayotgan tayyorgarliklar yuzasidan hisobotlar tinglandi.
Ushbu uchrashuv davomida O‘zbekiston Milliy olimpiya qo‘mitasi rahbari Rustam Shoabdurahmonov Xalqaro Olimpiya qo‘mitasi prezidenti Tomas Bax bilan uchrashib, yurtimizda sportni rivojlantirish va sohada olib borilayotgan keng ko‘lamli ishlar yuzasidan suhbat olib borishdi.
O‘z navbatida Tomas Bax Xalqaro Olimpiya qo‘mitasining 125 yillik faoliyati davomida butun dunyoda Olimpiya harakatini rivojlantirish yo‘lida olib borilgan ishlar yuzasidan qilgan nutqi yig‘ilganlarning diqqat-e’tiborida bo‘ldi.
