Italiya chempionatining ushbu mavsumi «Yuventus» uchun ancha qiyin kechmoqda. Sarri shogirdlari o‘tkazilgan 8ta o‘yinning faqat bittasida raqibni 2ta to‘p farqi bilan mag‘lub etdi. Qolgan barcha o‘yinlar yo bitta to‘p farqi bilan g‘alaba, yoki durang bilan yakunlandi.

«Bolonya»ga qarshi o‘yinni turinliklar faol boshlab, asta-sekin bosimni oshirib borishdi. Uchrashuvning 20-daqiqasiga kelib, bu o‘z samarasini berdi. Ronalduning zarbasidan so‘ng to‘p darvoza to‘riga borib tushdi.

Mehmonlar esa tezda hisobni tenglashtirishdi. Danilo Larangeyra burchak zarbasidan so‘ng to‘pni darvoza "to‘qqizligi"ga joylab qo‘ydi.

Maydon egalari tanaffusga qadar boshqa xavfli vaziyat yarata olishmadi. Ikkinchi bo‘limni esa katta ishtiyoq bilan boshlab, yana oldinga o‘tib olishdi. Gol muallifi — Miralem Pyanich.

O‘yin oxiriga qadar "keksa sinyora" gol urish bir qator imkoniyatlarga ega bo‘ldi. "Bolonya" posbonining seyvlari evaziga to‘p darvozaga kirmadi. O‘yin so‘ngida esa bolonyaliklar hisobni tenglashtirish uchun 2ta imkoniyat ega bo‘lishdi. Bir vaziyatda to‘p to‘singa tekkan bo‘lsa, bir vaziyatda Buffon qutqardi.

Shu tariqa, "Yuventus" A seriyada mag‘lubiyatsiz seriyani davom ettirmoqda va o‘z ochkolarini 22taga yetkazib oldi.

Italiya chempionati, 8-tur
Yuventus – Bolonya 2:1 (1:1, 1:0)
Gollar: 1:0 – 19 Ronaldu, 1:1 – 26 Larangeyra, 2:1 – 54 Pyanich.
Yuventus – Buffon, de Ligt, Aleks Sandro, Bonuchchi, Rabyo (Matyuidi, 73), Kuadrado, Pyanich, Xedira (Bentankur, 62), Bernardeski, Ronaldu, Iguain (Dibala, 82).
Bolonya – Skorupski, Bani, Larangeyra, Mbaye, Kreychi, Soriano, Svanberg (Olsen, 80), Orsolini, Poli (Djemaili, 82), Sansone (Santander, 80), Palasio.
Ogohlantirishlar: Sansone (22), Rabyo (29), Bentankur (70), Larangeyra (84), Bani (90).